NEWS.am-ը զգալի կրճատումներով ընթերցողի ուշադրությանն է ներկայացնում ԵՄ ընդլայնման եւ եվրոպական հարեւանության քաղաքականության հարցերի հանձնակատար Յոհաննես Հանի՝ «The Parliament Magazine»-ում հրապարակված հոդվածը:
Շատերի համար Եվրամիության սահմաններից դեպի արեւելք տեղի ունեցող իրադարձությունները Եվրոպայի միասնականության եւ վճռականության փորձարկում են: Այդ իմաստով ես Ռիգայում նախանշված գագաթաժողովը դիտարկում եմ որպես ռազմավարական նշանակությունները հաստատելու հնարավորություն, որոնք մենք տալիս ենք արեւելյան գործընկերությանը: Մեր անմիջական հարեւանությամբ տեղի ունեցող իրադարձություններն ուղղակի ազդեցություն են ունենում մեր կայունության, անվտանգության եւ բարգավաճման վրա:
Մենք ցանկանում ենք ցուցադրել մեր վեց գործընկերների՝ Հայաստանի, Ադրբեջանի, Բելառուսի, Վրաստանի, Մոլդովայի եւ Ուկրաինայի հետ ավելի սերտ եւ անհատական հարաբերությունների հասնելու լիարժեք վճռականությունը՝ անկախ ԵՄ-ի հետ հարաբերությունների առումով նրանց անհատական հավակնություններից: Գործընկերների ցանկությունների եւ շահերի վրա հիմնված մեր Արեւելյան գործընկերությունը նախատեսված է անհատական նախագիծ դառնալու համար:
Արեւելյան գործընկերության հանդեպ ԵՄ մոտեցումը միշտ թափանցիկ է եղել եւ կենտրոնացած գործընկեր-երկրների հետաքրքրությունների եւ պահանջարկների շուրջ: Վերանայումը կիրառվելու է ինչպես արեւելյան, այնպես էլ հարավային գործընկերների պարագայում, եվրոպական հետաքրքրությունների առավել շեշտադրմամբ:
Գագաթաժողովն առնչվում է Եվրամիության եւ վեց գործընկերների միջեւ հարաբերություններին եւ ուղղված չէ որեւէ երրորդ երկրի դեմ: Ռիգայում հանդիպումը ոչ միայն արեւելքում մեր փոխգործակցության, այլեւ մի շարք քաղաքական քայլերի եւ միջոցների քաղաքական ցուցադրություն կլինի՝ համաձայնության հասնելու համար: Նպատակներից մեկն էլ առաջընթացի գնահատումն է, որը ձեռք է բերվել ԵՄ-ի եւ արեւելյան գործընկերների հարաբերություններում, մասնավորապես՝ 2013 թվականի Վիլնյուսի գագաթաժողովից հետո: Մենք Արեւելյան գործընկերությունը դուրս ենք բերել կառավարությունների սահմաններից՝ այն տարածելով խորհրդարանների, տեղական իշխանական մարմինների, քաղաքացիական հասարակության եւ բիզնեսի վրա:
Գագաթաժողովը կշարունակի այդ ուղին՝ արեւելյան գործընկերներին ավելի մոտեցնելով ԵՄ-ի հետ քաղաքական ասոցացման, տնտեսական համագործակցության եւ այլ հարցերում առաջընթացի օգնությամբ:
Վիլնյուսի գագաթաժողովից հետո Վրաստանի, Մոլդովայի եւ Ուկրաինայի հետ խորը եւ համապարփակ ազատ առեւտրի գոտու ստեղծման եւ ասոցացման մասին համաձայնագրերի ստորագրումը մեր համագործակցությունը նոր մակարդակի բարձրացրեց:
Իսկ հիմա՝ Ռիգայի գագաթաժողովի ընթացքում, հնարավոր կլինի գնահատել այդ գործընթացների նախնական փուլերը եւ ցուցադրել համագործակցության խորացմանը մեր հավատարմությունը: Ես այդ հնարավորությունը նաեւ կօգտագործեմ, որպեսզի ընդգծեմ բարեփոխումների կարեւորությունը: