Վերջին 17 տարիներին ԱՄՆ-ում հետազոտողները թռիչքների կառավարման համակարգերի կայունությունը բարելավելու նպատակով օգտագործում են մաթեմատիկոս Նաիրա Հովակիմյանի հաշվարկները: Մարտին նրա հետազոտական խմբի մեթոդը Կալիֆորնիայի ավիաբազայում հաջողությամբ փորձարկվել է «Learjet» ինքնաթիռների մասնակցությամբ: Այս մասին գրում է «ECN Magazine»-ը:
Մեխանիկական գիտությունների պրոֆեսոր եւ Իլինոյսի համալսարանի գիտնական Հովակիմյանը 1988 թվականին ավարտել է Երեւանի պետական համալսարանը, որտեղ տեսական մեխանիկա եւ կիրառական մաթեմատիկա է ուսումնասիրել: Հետագայում նա ուսումը շարունակել է Մոսկվայում: 1994-1998 թվականներին շրջագայելով աշխարհով մեկ, օգտվելով սովորելու եւ դասախոսելու առաջարկներից, եղել է Գերմանիայում, Ֆրանսիայում եւ Իսրայելում:
1998 թվականին նա Ջորջիայի Տեխնոլոգիական համալսարանից թռիչքների կառավարման կայունությունը հետազոտող թիմում աշխատելու հրավեր է ստացել: Միաժամանակ, ԱՄՆ ռազմաօդային ուժերի եւ NASA-ի հովանավորության շնորհիվ, Հովակիմյանը 2003 թվականին դառնում է Վիրջինիայի Տեխնոլոգիական համալսարանի դոցենտ: Այնտեղ էլ նա այլ հետազոտողների հետ համատեղ «L1» վերահսկողության տեսությունն է մշակում, որը կարող է օդաչուին օգնել անսպասելի իրավիճակներում վերականգնել ինքնաթիռի վերահսկողությունը:
NASA-ն մոդելը փորձարկել է տարբեր դժվարին պայմաններում եւ ագրեսիվ մանեւրումներում: Հաջող փորձարկումներից հետո Հովակիմյանի հետազոտությունը միջազգային ճանաչում է ստանում: