Ձայնային ծառայությունները Հայաստանի բաժանորդներին աստիճանաբար ավելի քիչ են հետաքրքրում, իսկ տվյալների փոխանցումը՝ ավելի շատ: Այս մասին մայիսի 19-ին լրագրողների հետ հանդիպմանը հայտարարեց Հայաստանում «Բիլայն»-ի գլխավոր տնօրեն Անդրեյ Պյատախինը:
2014 թվականի ընթացքում ընկերության ցանցում տվյալների փոխանցման ծավալն աճել է 70%-ով: Իհարկե, շահույթն ավելի պակաս չափով է ավելացել՝ շուրջ 20%-ով: «Սակայն տվյալները, ձայնի համեմատ, առաջընթաց տեմպերով են աճում, ընդ որում՝ ոչ միայն Հայաստանում: Պատճառներից մեկն էլ սմարթֆոնների ներդրման աճն է»,- նկատեց Պյատախինը:
«ԱրմենՏել»-ը (Beeline ապրանքանիշ) Հայաստանի խոշորագույն հեռահաղորդակցության օպերատորներից, հարկատուներից եւ գործատուներից մեկն է: Ընկերությունում շուրջ 2.500 մարդ է աշխատում: 2014 թվականին «ԱրմենՏել»-ի հարկերն ու պետական մյուս վճարումները շուրջ 14 մլրդ դրամ են կազմել:
