Թուրքական իշխանություններին լուրջ անհանգստություն է պատճառել, որ քրդական «Ժողովուրդների դեմոկրատական»  (HDP) կուսակցությունը կարող է ընտրություններում հաղթահարել 10 տոկոսանոց շեմը եւ հայտնվել խորհրդարանում։

Թուրքական Milliyet-ի փոխանցմամբ՝ «Թուրքիա-Եվրոպա կրթական եւ գիտահետազոտական հիմնադրամի» կողմից Գերմանիայում թուրք ընտրողների շրջանում իրականացրած սոցհարցումների արդյունքները ցույց են տվել, որ քրդական  HDP-ի վարկանիշը բարձրացել է։

Սոցհարցման արդյունքներով Եվրոպական երկրներում Թուրքիայում ընտրելու իրավունք ունեցող քաղաքացիների 53 տոկոսը ձայնը տալու է իշխող «Արդարություն եւ զարգացում» կուսակցությանը, ընդդիմադիր «Ժողովրդա-հանրապետական» կուսակցությանը՝ 17,  քրդական «Ժողովուրդների դեմոկրատական» կուսակցությանը՝ 14 տոկոս։

Եվրոպայում քրդական կուսակցության վարկանիշի կտրուկ բարձրացումը մասնագետները համարում են կուսակցության առաջնորդ Սելահաթին Դեմիրթաշի եվրոպական երկրներ այցով։

Նշենք, որ Թուրքիայում խորհրդարանական հերթական ընտրությունները տեղի են ունենալու հունիսի 7-ին։ Ընտրություններին մասնակցելու են նաեւ երկրից դուրս գտնվող մոտ 5 մլն ընտրող։