Արգենտինայում Կասա դե Տուկուման պատմական տուն-թանգարանը Հայոց ցեղասպանության 100-րդ տարելիցի առիթով օրերս լուսավորվել է հայկական դրոշի գույներով: Այս մասին հաղորդում է Prensa Armenia գործակալությունը:
Կասա դե Տուկումանն ազգային պատմական հուշարձան է Արգենտինայում, քանի որ 1816 թվականի հուլիսի 9-ին այստեղ է ընդունվել Արգենտինայի անկախության Հռչակագիրը:
Գեղարվեստական նախաձեռնությունը, որն ուղեկցվել է նաեւ երաժշտությամբ եւ բանաստեղծությունների ընթերցմամբ, առաջարկել են Անկախության պատմական տուն-թանգարանը, Խտրականության, այլատյացության եւ ռասիզմի դեմ ազգային ինստիտուտը եւ Հարավային Ամերիկայի Հայ դատի հանձնախումբը:
«Ցեղասպանությունը խտրականության ծայրահեղ ձեւն է, եւ հանրության կողմից դրա ընկալումն անհրաժեշտ է՝ մարդկության դեմ այդ հանցագործությունների կրկնությունը կանխելու համար»,- ասել է Խտրականության, այլատյացության եւ ռասիզմի դեմ ազգային ինստիտուտի համակարգող Գիլյերմո Ֆերրայոլին: