Էլեկտրաէներգիայի թանկացման դեմ պայքարող՝ «Ոչ թալանին» քաղաքացիական նախաձեռնությունը մայիսի 23-ին ավտոերթ կանցկացնի՝ իրազեկելու համար մայիսի 27-ին անցկացվելիք բողոքի ակցիայի մասին: Այս մասին նախաձեռնության անդամները հայտարարեցին այսօր՝ մայիսի 21-ին հրավիրված հանրային քննարկման ժամանակ:

«Հավաքվելու ենք ու պտտվենք Երեւանի գրեթե բոլոր համայնքներով: Ամեն փողոցում, բակում բարձրախոսի, թռուցիկների միջոցով իրազեկելու ենք մարդկանց երթի մասին»,- ասաց նախաձեռնության համակարգող խմբի անդամ Մաքսիմ Սարգսյանը:

Ըստ նրա՝ դա առաջին իրազեկումը չի լինի, իրենք պարբերաբար իրազեկման փոքրիկ ակցիաներ են անցկացնում քաղաքի կենտրոնում:

Նախաձեռնության մասնակիցների խոսքով, մարդկանց շրջանում այս պահին մեծ բողոքի ալիք կա, ինչում համոզվել են իրազեկումների ժամանակ: Նրանք նախատեսել են, որ բողոքի երթին մեծ թվով քաղաքացիներ կմասնակցեն եւ նրանց թիվը հետագայում կավելանա:

Նշենք, որ ՀԷՑ-ը դիմել է Հանրային ծառայությունների կարգավորող պետական հանձնաժողովին՝ բաժանորդների համար էլեկտրաէներգիայի սակագինը 16 դրամով բարձրացնելու համար։ Հոսանքի սակագնի ավելացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի Հայաստանի ցանկացած քաղաքացու գրպանին։