«Ոչ թալանին» քաղաքացիական նախաձեռնությունը կոչ է անում մայիսի 25-ին ժամը 21:00-ից մինչեւ 23:00-ն անջատել բնակարանների էլեկտրաէներգիան՝ ի նշան դրա սակագնի հնարավոր թանկացման դեմ բողոքի: Այս մասին նախաձեռնության անդամները հայտարարեցին այսօր՝ մայիսի 21-ին անցկացրած հանրային քննարկման ժամանակ: 

«Եթե բոլորս մեր բնակարանների լուսավորությունը, հեռուստացույցը եւ էլեկտրաէներգիայով աշխատող այլ սարքերն անջատենք, ՀԷՑ-ին մեծ վնաս կպատճառենք: Եթե 100 հազար ընտանիք այդպես անի, Էլցանցերի վնասը կկազմի միջինը 4 մլն դրամ: Իսկ եթե կան մարդիկ, որ չեն կարող այդ անել երկու ժամով, առաջարկում ենք ակցիային միանալ կես կամ մեկ ժամով»,- ասաց նախաձեռնության համակարգող խմբի անդամ Մաքսիմ Սարգսյանը:

Նախաձեռնության անդամների խոսքով՝ ակցիան շարունակական կլինի:

Նշենք, որ ՀԷՑ-ը դիմել է Հանրային ծառայությունների կարգավորող պետական հանձնաժողովին՝ էլեկտրաէներգիայի սակագինը 16 դրամով բարձրացնելու համար։ Հոսանքի սակագնի ավելացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի Հայաստանի ցանկացած քաղաքացու գրպանին։