Լատվիայի արտգործնախարար Էդգարս Ռինկեւիչը «Կոմերսանտ» պարբերականի հետ զրույցում անդրադարձել է Ռիգայում ընթացող «Արեւելյան գործընկերության» գագաթնաժողովի շրջանակներում Հայաստանի հետ նոր համաձայնության բանակցություններին եւ խոսել գործընկերության անդամ երկրների համար վիզային ռեժիմի ազատականացման հնարավորությունների մասին։
Անդրադառնալով գագաթնաժողովի առաջին օրը համատեղ հայտարարության տեքստում Ղրմի անեքսիայի մասին ձեւակերպմանը Հայաստանի եւ Բելառուսի դեմ լինելու հանգամանքին՝ արտգործնախարարը նշեց, որ ցանկացած գագաթնաժողովում միշտ էլ լինում է դիրքորոշումների համաձայնեցման աշխատանք։ Բոլոր սկզբունքային դրույթները պետք է համաձայնեցվեն արտգոծնախարարների մակարդակով մայիսի 22-ին։
Հարցին, թե Վրաստանի հետ վիզային ռեժիմի չեղարկումը չի ստեղծի արդյոք նախադեպ կովկասյան մյուս երկրների համար եւ չի վիրավորի արդյոք Թուրքիային, Ռինկեւիչը պատասխանել է. «Մենք վիզային ռեժիմի ազատականացման հնարավորություն ենք տալիս մեր բոլոր գործընկերներին։ Բացի այդ, տվյալ հարցում մենք որոշակի առաջընթաց ենք գրանցել նաեւ Հայաստանի եւ Ադրբեջանի հետ։ Մենք վիզային ռեժիմի մեղմացման մասին խոսում ենք նաեւ Բելառուսի հետ, մեղմացման ոչ թե ազատականացման։ Եթե Հայաստանն ու Ադրբեջանը ցանկանան եւ բոլոր պահանջները կատարեն, ապա ես ոչ մի խնդիր չեմ տեսնում նրանց նման հնարավորություն չտալու համար։ Չէ՞ որ մենք անվիզա ռեժիմ ենք հաստատել Մոլդովայի հետ»։
Արտգործնախարարը խոսել է նաեւ Հայաստանի հետ շրջանակային համաձայնագրի նախապատրաստության մասին՝ նշելով, որ այդ հարցը քննարկվել է նաեւ հունվարին ԵՄ-Հայաստան խորհրդի ժամանակ։ «Մենք պատրաստ ենք նոր համաձայնագրի հարցով սկսել բանակցությունները Երեւանի հետ, որը հիմնված կլինի այն կետերի վրա, որոնք 2013թ. արդեն ունեինք Հայաստանի հետ։ Սակայն առանցքային տարբերությունն այն է լինելու, որ Հայաստանն այսուհետ ԵՏՄ անդամ է, եւ մենք միջոցներ կփնտրենք որպեսզի ԵՏՄ-ի առաջ Հայաստանի պարտավորությունները հակասության մեջ չմտնեն Եվրամիության որոշ ոլորտներում հարաբերությունների զարգացմանը»,- նշել է Ռինկեւիչը։