Հայաստանը եւ Եվրամիությունը մտադիր են շարունակել համապարփակ համագործակցությունը բոլոր հնարավոր ոլորտներով եւ ուղղություններով՝ նկատի առնելով Հայաստանի նաեւ պարտավորությունները այլ ինտեգրացիոն պրոցեսներում: Այդ մասին Ռիգայում «Ազատություն» ռադիոկայանին տված հարցազրույցում հայտնել է Հայաստանի ԱԳ նախարար Էդվարդ Նալբանդյանը:
«Վերահաստատվեց այն, ինչի մասին ասվել էր դեռ հունվարի 20-ին՝ Հայաստան - Եվրամիություն խորհրդի նիստի ժամանակ, որ մենք մտադիր ենք՝ Հայաստանը եւ Եվրամիությունը, շարունակել համապարփակ համագործակցությունը բոլոր հնարավոր ոլորտներով եւ ուղղություններով՝ նկատի առնելով Հայաստանի նաեւ պարտավորությունները այլ ինտեգրացիոն պրոցեսներում:
Եվ այսօր Հռչակագրում էլ դրա մասին է խոսվում, որ այն գործընթացը, որը մենք սկսել էինք Եվրամիության հետ դեռ նոյեմբեր ամսին՝ այդպես կոչված խորհրդատվությունները, ինչու խորհրդատվություններ, այլ ոչ թե բանակցություններ՝ որովհետեւ Եվրոպական միության բանակցող թիմը չուներ մանդատ, եւ հիմա պարզ է դառնում, որ այդ խորհրդատվությունները մենք եզրափակեցինք մարտ ամսին եւ եկանք ընդհանուր հասկացողության, որ պետք է շուտով բանակցություններ սկսենք, եւ դրա մասին նաեւ արտացոլվեց ընդհանուր Հռչակագրում: Եվ պայմանավորվածություն ձեռք բերվեց, որ մոտակա ժամանակ Եվրամիության խորհուրդը կվերահաստատի կամ կհաստատի այդ մանդատը բանակցող թիմի համար, եւ դրանից հետո մենք կսկսենք բանակցություններ՝ մշակելու համար նոր իրավական փաստաթուղթ՝ մեր հարաբերությունների հետագա ընդլայնման, խորացման եւ զարգացման:
Բացի դրանից, այս Հռչակագրում նշվեց եւս մեկ կարեւոր ուղղություն՝ դա շարժունակության բնագավառն է: Մենք կարեւորություն ենք տալիս այդ ուղղությանը, եւ արդեն Հռչակագրում նշվեց, որ մոտակա ժամանակ կսկսվի վիզային ռեժիմի վերաբերյալ երկխոսությունը»,- ասել է Նալբանդյանը:
Նրա խոսքով, խոսքը գնում է նրա մասին, որ ռեադմիսիայի, այսինքն՝ հետընդունման եւ նաեւ վիզային ռեժիմի դյուրացման այդ համաձայնագրերը, որոնք կնքվել էին Եվրամիության հետ եւ որոնք ուժի մեջ մտան հունվար ամսին 2014 թվականի, դրանք ճանապարհ բացեցին, որպեսզի նոր գործընթաց մեկնարկի, նոր գործընթաց, որը տանելու է դեպի վիզային ռեժիմի, արտոնագրային ռեժիմի ազատականացում: «Խոսքը գնում է հենց նրա մասին, որ Հայաստանի քաղաքացիները ազատված կլինեն Եվրամիություն վիզաների եւ արտոնագրերի պահանջից:
Մենք շարունակել ենք մեր բանակցությունները եւ շփումները նաեւ ոլորտային բնագավառներում համագործակցության մասին, որոշ ոլորտային համագործակցության մասին նշում կա նաեւ Հռչակագրի մեջ: Ինչ վերաբերում է Հայաստանին՝ դա լինի Horizon 2020 ծրագրի հետ կապված, որը կապված է գիտության հետազոտությունների բնագավառին, նաեւ խոսքը գնում է ձեռնարկատիրությունների խրախուսման, հատկապես՝ փոքր եւ միջին ձեռնարկատիրությունների, նաեւ ավիացիայի բնագավառում եւ այլ բնագավառներում:
Այսինքն՝ այն, ինչ որ սպասվում էր, մենք այսօր ունենք»,- նշել է Նալբանդյանը:
