Այն, որ Գերմանիայի կանցլեր Անգելա Մերկելը հանդիպում է ունեցել Հայաստանի նախագահի, բայց ոչ Ադրբեջանի պատվիրակության հետ, վկայում է Բեռլինի եւ Բաքվի միջեւ լարված հարաբերությունների մասին: Այս մասին NEWS.am-ի թղթակցին հայտարարեց քաղաքագետ Ստեփան Սաֆարյանը՝ մեկնաբանելով «Արեւելյան գործընկերության» Ռիգայի գագաթնաժողովի արդյունքները:
Նրա խոսքով՝ պետք է հաշվի առնել, որ Գերմանիայի եւ Ադրբեջանի հարաբերությունները մոտ մեկ տարի է՝ լարված են: Ադրբեջանը մի քանի անգամ Գերմանիային մեղադրել է իր ներքին գործերին միջամտելու մեջ, մասնավորապես այն բանից հետո, երբ Բեռլինում մարդու իրավունքների հարցով քննարկում կայացավ:
Բացի այդ, Ադրբեջանը դժգոհ է Բեռլինում տեղակայված «Արտաքին կապերի եվրոպական խորհուրդ» (ECFR) կազմակերպության կողմից իր հասցեին հնչեցրած քննադատություններից: Բաքուն այդ կազմակերպությանը մեղադրում է հայկական լոբբիին աջակցելու մեջ:
«Փորձագիտական շրջանակներում լավ են հիշում նաեւ Ադրբեջանում մարդու իրավունքների ոտնահարումների հարցով գերմանական կողմի հայտարարություններին տված Բաքվի արձագանքը: Վերջինս կոշտ արձագանք տվեց եւ անգամ հանեց գերմանական ընկերություններին նավթային տենդերներից: Մեկ խոսքով ասած՝ Գերմանիայի եւ Ադրբեջանի հարաբերությունները երբեք լավ չեն եղել, եւ Ռիգայի գագաթնաժողովում ուղղակի խտացել էին: Եվրոպայում հասկանում են, որ Ադրբեջանի վարքը հիմնված է բոյկոտի եւ շանտաժի վրա, եւ այնպիսի ազդեցիկ երկիր, ինչպիսին Գերմանիան է, կարող է ոչ ուղղակի քայլերով դա շատ ուղղակի հասկացնել տալ»,- նշեց Սաֆարյանը:
