Հայաստանի դպրոցներում կարող են ռոբոտատեխնիկայի խմբակներ հայտնվել 7-8 տարեկանների համար։ Այդ մասին NEWS.am-ի թղթակցի հետ զրույցում ասել է «Symotec» ընկերության ղեկավար Հրաչյա Խաչատրյանը։
Ներկայումս ընկերությունը հավաքածուներ է ուղարկում ավագ դասարանների համար, նման խմբակներ գործում են 60 դպրոցներում։ «Եթե երեխան բավարար գիտի եւ կարողանում է, նրան կընդունեն։ Բայց այս մոդելներն իրենց բարդությամբ նախատեսված են ավագ դասարանների համար։ Իսկ մեր նոր մոդելները պարզ են լինելու, սկսնակների համար»,- ասել է Խաչատրյանը։
Հիմնականում նոր մոդելները ինտերգրված են լինելու գրաֆիկական հիմքով ծրագրի վրա, որոնք շատ հեշտ կլինեն։ «Դրանք ալգորիթմեր կպահանջեն անգամ ոչ այնքան թվերի, որքան երկրաչափական ֆիգուրների տարրերի վրա»,- ասել է նա։
Ամենափոքրերի համար նախատեսված ծրագիրը ընկերությունը մտադիր է առաջարկել դպրոցներին եւ բոլոր հետաքրքրվողներին, իսկ ցածրդասարանցիների առաջին փորձերը հուսով են ներկայացնել արդեն այս տարի, «ArmRobotics» ամենամյա ցուցահանդեսում։