Իշխանությունները սև ցուցակ ունեն, որում հայտնվել են «Հիմնադիր խորհրդարանին» սատարող ու ապօրինի ռեժիմի դեմ պայքարող սփյուռքահայերը: Այս մասին այսօր՝մայիսի 25-ին, լրագրողների հետ հանդիպմանն ասաց «100-ամյակն առանց ռեժիմի» շարժման առաջնորդ, ազատամարտիկ Ժիրայր Սեֆիլյանը՝ հիշեցնելով, որ օրերս Հայաստանի իշխանությունները թույլ չեն տվել Հայաստան մուտք գործել «Հիմնադիր խորհրդարանի» պատգամավոր, «Հայկական վերածնունդ» համահայկական կազմակերպության Փարիզի մասնաճյուղի համակարգող, Ֆրանսիայի քաղաքացի Շանթ Ոսկերչյանին:
«Յուրաքանչյուր հայ իրավունք ունի ակտիվորեն հետաքրքրվել և զբաղվել հայրենիքի ներքին հարցերով, սակայն, ռեժիմն արգելում է նրանց դա անել և վստահ եմ, որ չի մարսելու: Այժմ կապի մեջ ենք Շանթի հետ, նրա հետ կապված միջադեպը սփյուռքահայերի համար պետք է կոնսոլիդացիայի ազդակ լինի: Ոսկերչյանը մենակ չէ, կարծում եմ, չի բացառվում, որ Շանթը շուտով կրկին կցանկանա վերադառնալ, և այդ ժամանակ ռեժիմը չի համարձակվի հեռացնել նրան»,- ասաց Սեֆիլյանը:
ԱԱԾ-ի պարզաբանումը, թե Շանթ Ոսկերչյանը Եվրոպայում Հայաստանի ազգային անվտանգությանը սպառնացող գործունեությամբ է զբաղվել, և այդ պատճառով նրան թույլ չեն տվել մտնել Հայաստան, Սեֆիլյանն անհեթեթ անվանեց.. «Անհեթեթ հայտարարություններ են անում: Ֆրանսիայի քաղաքացու նկատմամբ այդպիսի մեղադրանքներ հնչեցնելը անուղղակիորեն ուղղված է նաև Ֆրանսիային, քանի որ պետությունն իր քաղաքացուն թույլ է տվել Ֆրանսիայում զբաղվել Հայաստանի Հանրապետության անվտանգությանն սպառնացող գործունեությամբ»,-ասաց նա: