Մայիսի 23-ին ՀՀ Կոտայքի մարզում մոլեգնած մրրիկից 3 հովիվ է վիրավորվել։ Տղամարդիկ բլրի գագաթին անասուններ արածեցնելիս նկատել են մոտեցող ոլորապտույտ քամին։ Մրրիկը հասել է տղամարդկանց այն պահին,  երբ նրանք նստել են մեքենան եւ օդ բարձրացնելով մեքենան՝ նետել է ցած։ Դրա հետեւանքով հովիվներից երկուսը դուրս են նետվել մեքենայից, իսկ երրորդ հովիվը մեքենայով գլորվել է բլրից ցած։ Նրանք բոլորը տեղափոխվել են Աբովյան քաղաքի հիվանդանոց։

Ինչպես NEWS.am-ի թղթակցին տեղեկացրեցին հիվանդանոցից, տղամարդիկ Գեղաշեն գյուղի բնակիչներ են։

«Հատկապես տուժել է մեքենայով բլրից գլորված 44-ամյա Աշոտ Ղարիբյանը։ Հիվանդի մոտ ախտորոշել են գլխի վնասվածքներ, կապտուկներ, ողնաշարի պարանոցային ողի կոտրվածք, որը հանգեցրել է վերջույթների կաթվածի, կողերի կոտրվածքի, ուժեղ ներքին արյունահոսության։ Բժիշկները ստիպված են եղել հեռացնել տղամարդու փայծաղը»,- հայտնել են հիվանդանոցից։

Նյարդավիրաբուժական միջամտության անհրաժեշտության պատճառով Ղարիբյանին տեղափոխել են «Սուրբ Գրիգոր Լուսավորիչ» բժշկական կենտրոն, որտեղից NEWS.am-ին տեղեկացրին, որ այս պահին տղամարդու վիճակը գնահատվում է ծանր։ Նրան միացրել են արհեստական շնչառության ապարատին։