Հատուկ քննչական ծառայությունը կարճել է 1,5 տարի առաջ Վանաձորում մահացած 15-ամյա հանդբոլիստ Դավիթ Հովակիմյանի գործով կալանավորված Կարեն Կունգուրցեւի՝ բռնության վերաբերյալ հաղորդման քննությունը: Այս մասին NEWS.am-ին ասաց Կունգուրցեւի փաստաբան Արայիկ Պապիկյանը:
Նա հայտնեց, որ կասեցրել են նաեւ վկաներին ուղղորդելու վերաբերյալ հաղորդման քննությունը:
Նշենք, որ Կարեն Կունգուրցեւը ՀՀ հատուկ քննչական ծառայությունում հաղորդում է տվել այն մասին, որ սպանություն կատարելու կասկածանքով ՀՀ ոստիկանության Լոռու մարզային վարչության Վանաձորի բաժին բերման ենթարկվելուց հետո հատուկ ծառայություն իրականացնող պաշտոնատար անձինք ծեծի են ենթարկել իրեն՝ ստիպելով ընդունել, որ հանցագործությունը ինքն է կատարել:
Կարենը հայտնել է, որ իր տեղեկություններով՝ սպանության փորձը կատարել է այլ անձ, որի հայրը զբաղեցրած պաշտոնի բերումով մտերիմ հարաբերությունների մեջ է գտնվել Լոռու մարզի հատուկ ծառայություն իրականացնող պաշտոնատար անձանց հետ, սակայն վերջիններս նրան քրեական պատասխանատվությունից զերծ պահելու նպատակով հանցագործության կատարումը մեղսագրել են իրեն: