Սյունիքի մարզում լարվածություն եղել է միայն մարզպետի դեմ մահափորձի օրերին։ Այս մասին այսօր՝ մայիսի 26-ին, լրագրողների հետ զրույցում ասաց Սյունիքի փոխմարզպետ Վաչե Գրիգորյանը։
«Լարվածությունն այսօր, սակայն, չկա։ Քրեական գործ է հարուցվել, նախաքննություն է ընթանում, ամեն ինչ պարզ կդառնա»,- ասաց փոխմարզպետը։
Փոխմարզպետը համոզված է, որ Սուրիկ Խաչատրյանը թշնամիներ չունի, առավել եւս երկար տարիներ աշխատել է մարզպետի պաշտոնում։
Ավելի վաղ NEWS.am-ը հայտնել էր, որ Կապան-Գորիս ճանապարհին 2015թ. մայիսի 20-ին կրակել են Սյունիքի մարզպետ Սուրիկ Խաչատրյանի մեքենայի ուղղությամբ։ NEWS.am-ի տեղեկությունը հաստատել էր Սյունիքի մարզպետի խորհրդական Զարզանդ Նիկողոսյանը՝ հավելելով, որ տուժողներ չկան: Ժամեր անց Քննչական կոմիտեն մամուլի հաղորդագրություն էր տարածել՝ նշելով, որ ՀԿԳ քննչական գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի եւ 235-րդ հոդվածի 1-ին մասի հատկանիշներով: