ՀՀ քննչական կոմիտեի Երեւան քաղաքի քննչական վարչության Երեւան քաղաքի Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ՝ «Տաշիր» առեւտրի կենտրոնից տղամարդու ոսկյա թեւնոց գողանալու դեպքի առթիվ, որի շրջանակներում ձեռնարկվում են միջոցներ՝ պարզելու առերեւույթ հանցագործություն կատարած անձի ինքնությունը։
Քաղաքացի Վարդանյանը 2015թ. մայիսի 01-ին ահազանգել է, որ նույն օրը՝ ժամը 13:40-ի սահմաններում, «Տաշիր» առեւտրի կենտրոնում գտնվող առեւտրային տաղավարի վրայից 60-65 տարեկան, ալեհեր մազերով մի տղամարդ գաղտնի կերպով հափշտակել է իրեն պատկանող, խոշոր չափերի՝ 1.200.000 ՀՀ դրամ արժողությամբ, տղամարդու ոսկյա թեւնոց:
Քրեական գործով նախաքննության ընթացքում տուժողը ներկայացրել է տեսագրություններ՝ կարծիք հայտնելով, որ տեսագրության մեջ պատկերված սեւ պիջակով եւ տաբատով, սպիտակ վերնաշապկով, ալեհեր տղամարդն է վերցրել իրեն պատկանող ոսկյա թեւնոցը:
Ձեռնարկվում են անհրաժեշտ քննչական եւ դատավարական գործողություններ՝ օբյեկտիվ իրականությունը բացահայտելու համար։
Ովքեր ճանաչում են տեսագրությունում պատկերված անձին կամ որեւէ տեղեկություն ունեն նրա ինքնության կամ գտնվելու վայրի մասին, խնդրում ենք հայտնել ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժին կամ ոստիկանության մոտակա բաժին: