Վարդենիս-Մարտակերտ ավտոճանապարհը պատրաստ կլինի մինչեւ հաջորդ տարվա սկիզբ։ Այս մասին այսօր՝ մայիսի 27-ին, «Հայաստան» համահայկական հիմնադրամի հոգաբարձուների խորհրդի եւ տեղական մարմինների 24-րդ համատեղ նիստից առաջ լրագրողների հետ զրույցում ասաց հիմնադրամի գործադիր տնօրեն Արա Վարդանյանը։
Նրա խոսքով՝ ճանապարհի հողային աշխատանքներն արդեն ավարտվել են։
«Հայաստանի կողմից ասֆալտապատումն արվել է, ճանապարհի մնացած հատվածի ասֆալտապատումը կավարտվի ամենաուշը հաջորդ տարվա սկզբին»,- ասաց Արա Վարդանյանը՝ հավելելով, որ ֆինանսական միջոցները բավարար են ճանապարհի կառուցումն ավարտելու համար։
Լրագրողների հարցին, թե ինչ նոր ծրագրեր է պատրաստվում իրականացնել հիմնադրամը, գործադիր տնօրենը նշեց, որ նոր ծրագիրը ներկայացվելու է այսօր ԼՂՀ նախագահ Բակո Սահակյանի կողմից։
Նշենք, որ կառավարության ընդունելությունների տանն այսօր տեղի է ունենում հիմնադրամի նիստը, որին ներկա են ՀՀ եւ ԼՂՀ նախագահները, հոգաբարձուների խորհրդի 24 անդամները։