Սյունիքի մարզպետի որդու մասնակցությամբ միջադեպից տուժած ընտանիքից նամակ ստանալով ես դիմել եմ իրավապահ մարմիններին: Այս մասին, այսօր՝ մայիսի 27-ին, ԱԺ-ում լրագրողների հետ զրույցում նշել է Հայաստանի մարդու իրավունքների պաշտպան Կարեն Անդրեասյանը:
«Ինչ վերաբերում է նրան, թե արյոք այդ միջադեպի մեղավորները կպատժվեն, որի հետեւանքով երիտասարդը տեսողության հետ կապված լուրջ խնդիրներ ունի, ապա կարող եմ ասել, որ մենք հետեւողականորեն հետեւում ենք գործընթացին եւ զբաղվում ենք այդ գործով»,-վստահեցրել է Անդրեասյանը՝ հիշեցնելով, որ խորհրդարանում իր վերջին ելույթում գլխավոր դատախազ Գեւորգ Կոստանյանը նշել է, որ օմբուդսմենի ինստիտուտի լիազորությունները սահմանափակ են:
ՄԻ պաշտպանի խոսքով սահմանափակումն այն է, որ իրավապահ մարմիններն իրավունք ունեն տեղեկատվություն չտրամադրել դեռեւս չավարտված գործերով: «Եւ նույնիսկ այդ պայմաններում մենք կարողանում ենք ուղիներ գտնել՝ հետեւելու համար այս կամ այն գործին»,-ընդգծել է նա: