Էլեկտրաէներգիայի թանկացման շուրջ ստեղծված թեժ իրավիճակի ու հասունացող սոցիալական զայրույթի մթնոլորտում, այսօր ցերեկը միացված էր Երեւանի Տերյան փողոցի փողոցային լուսավորությունը:
Պետք է նշել, որ Երեւանում այս երեւույթը հազվադեպ չէ, բոլոր երեւանցիներն էլ գիտեն, որ քաղաքային լուսավորության պատասխանատուների աշխատանքային ծրագիրը երբեմն «կախում» է, ու գիշերվա փոխարեն ցերեկն են լույսերը միացնում: «Դավադրության տեսություններին» հավատացողները հնարավոր է ասեն, որ նման երեւույթները կարող են հաճախակիանալ հաշվետվությունների շրջանում, երբ քաղաքային լուսավորության պատասխանատուն պետք է ծախսերը հիմնավորի: Ցերեկը գիշերային լուսավորության միացրած լինելը բազմաթիվ հարցեր կարող է առաջացնել, ասենք, օրինակ՝ հնարավոր է ՀԵՑ-ին ինչ-որ մեկը լավությո՞ւն է անում, որ հանկարծ այնպես չստացվի, որ լուսավորությանը հատկացված բյուջեն ամբողջությամբ չծախսվի: Հուսով ենք, որ պատկան մարմինները կվերացնեն այս երեւույթը ու կպարզաբանեն ցերեկային լուսավորության պատճառը:
Ամեն դեպքում ինչ պատճառ էլ, որ լինի՝ պատահականություն, թե հատկապես դիտավորություն, բյուջեն անիմաստ վատնելը գրական լեզվով ստահակություն է, բայց ժողովուրդը նման երեւույթին ավելի ազատ բառերով է արձագանքում:
