Երեւանի Մովսես Խորենացի փողոցի թիվ 25 շենքի տանիք են բարձրացել ամուսիններ Եղիշե Գեւորգյանն ու Ռուզաննա Մարդանյանը, որոնք սպառնում են ինքնասպանություն գործել՝ ցած նետվելով 11 հարկանի շենքից: Այս մասին NEWS.am-ի թղթակցին հայտնեցին ԱԻՆ-ից:
Մեզ փոխանցեցին, որ դեպքի վայրում են այժմ փրկարարները, ովքեր համոզում են ամուսիններին չդիմել նման ծայրահեղ քայլի: Մեր տեղեկություններով՝ ընտանիքում ունեն երեք անչափահաս երեխա, իսկ ամուսինները ցանկանում են ինքնասպանության գործել, քանի որ գույքային խնդիրներ ունեն պետության հետ:
Հիշեցնենք, որ Գեւորգյանների ընտանիքը՝ իրենց 3 անչափահաս երեխաների հետ միասին, հատել էին հայ-ադրբեջանական սահմանը եւ հայտնվել Նախիջեւանի տարածքում: Ընտանիքը Հայաստան է վերադարձվել 2014-ի դեկտեմբերի 12-ին` Կարմիր խաչի միջազգային կոմիտեի միջնորդությամբ:
ԱԱԾ քննչական վարչության վարույթում էր գտնվում Ադրբեջանից Հայաստան վերադարձված Գեւորգյանների վերաբերյալ` ՀՀ ՔՕ 329-րդ հոդվածի առաջին մասի հատկանիշներով (Առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելը) հարուցված քրեական գործը, որի շրջանակներում ամուսիններն անցնում էին որպես մեղադրյալ: