«Ազատամարտիկների դաշինքը» այսօր՝ մայիսի 27-ին, մասնակցելու է էլեկտրաէներգիայի թանկացման դեմ «Ոչ թալանին» նախաձեռնող խմբի կազմակերպած բողոքի ակցիային: Այս մասին NEWS.am-ի հետ զրույցում ասաց «Ազատամարտիկների դաշինքի» խորհրդի անդամ, «Ապարան» ջոկատի հրամանատար Ռազմիկ Պետրոսյանը:
«Ճիշտ է` պաշտոնապես չենք հայտարարել, բայց մենք նույնպես այսօր կմասնակցենք բողոքի ակցիային, քանի որ աշխատանք չունեցող եւ աղքատ ժողովրդի համար սա արտագաղթի եւս մեկ առիթ կտա»,-ասաց նա:
Ազատամարտիկի խոսքով՝ այս եւ երկրում մնացած խնդիրների լուծման համար մեկ ուղի կա՝ իշխանափոխություն:
«Մեր քաղաքացիները պետք է գլուխ չխոնարհեն եւ ենթարկվեն իշխանությունների քմահաճույքին: Նման նախաձեռնություններով կարելի է ձեւավորել կուռ ընդդիմություն, որը կպայքարի այս իշխանությունների դեմ»,-ասաց նա:
Ռազմիկ Պետրոսյանի կարծիքով՝ այս թանկացումն անհիմն է, քանի որ Հայաստանը էլեկտրաէներգիա արտահանող երկիր է, եւ կարող է իր բնակչության համար ապահովել ցածր արժեքով էլեկտրաէներգիա:
Նշենք, որ այսօր էլեկտրաէներգիայի թանկացման ակցիային մասնակցելու են նաեւ «Նաիրիտի» աշխատակիցները:
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը մոտ 16 դրամով բարձրացնելու համար։ Հոսանքի թանկացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի ցանկացած ՀՀ քաղաքացու գրպանին։