Համակուրսեցու սպանության մեջ մեղավոր ճանաչված եւ ցմահ ազատազրկման դատապարտված Մհեր Ենոքյանի շահերը ընդդեմ գլխավոր դատախազության, այսուհետև կներկայացնի փաստաբան Լևոն Բաղդասարյանը։ Այսօր՝ մայիսի 27-ին, «Նուբարաշեն» ՔԿՀ-ում տեղի ունեցած դատական նիստին դատարանը բավարարեց Ենոքյանի համապատասխան միջնորդությունը։
19 տարի առաջ ցմահ ազատազրկման դատապարտված Ենոքյանը, որը պնդում է, որ մեղավոր չէ համակուրսեցու սպանության մեջ, նշեց, որ քրեական գործում երևան են եկել նոր հանգամանքներ, որոնց հիման վրա պետք է հարուցվի վարույթ ու վերանայվի քրեական գործը.
«Ես կարծում եմ, որ իրավապահ մարմինները, դատախազությունը գործում երևան եկած նոր հանգամանքներն անտեսում են: Քրեական գործով չի իրականացվել մատնահետքաբանական, դատահոգեբանական փորձաքննություն, հանցագործության գործիքի վրա ոչ մի ապացույց չի գտնվել: Դատախազությունը լուրջ չի վերաբերվում դրանց, այնինչ դրանք կարող են լիովին փոխել ցմահ ազատազրկման որոշումը: Դատախազությունում ասում են` դե, ցմահ դատապարտել են, թող գնա մեռնի, քրեական գործն ինչի՞ վերանայենք»,-ասաց Ենոքյանը:
Դատարանը դատական նիստը հետաձգեց, հաջորդ նիստը տեղի կունենա հունիսի 15-ին:
Հիշեցնենք, որ 20 տարեկանում` 1996 թ-ին Մհեր Ենոքյանը դատապարտվել է մահապատժի` մեղադրվելով համակուրսեցու`սպանության մեջ /ՀՀ Քր.Օր.-ի 99-րդ հոդվածի 1-ին և 6-րդ կետեր/: ՀՀ նախագահի 2003 թ-ի հրամանագրով` ի թիվս 41 մահապատժի դատապարտվածների, պատիժը փոխարինվել է ցմահ ազատազրկման: Ենոքյանն իրեն մեղավոր չի ճանաչել դատարանում: Գործով մյուս մեղադրյալն Արամ Հարությունյանը դատապարտվել էր նույն գործով, սակայն 15 տարի ազատազրկման: Նա այժմ ազատության մեջ է:
