Սոցիալ Դեմոկրատ Հնչակյան կուսակցությունը իր խոր մտահոգությունն է հայտնում էլեկտրաէներգիայի կտրուկ թանկացման հայտի կապակցությամբ:
Այս առթիվ ՍԴՀԿ-ն հայտարարություն է տարածել, որում ասվում է.
«1. Ի սկզբանե բաշխիչ էլեկտրացանցերի մասնավորեցման գործընթացը տեղի ունեցավ բազմաթիվ խախտումներով: ՀՀ կառավարության եւ Համաշխարհային բանկի կողմից հայտարարված մրցույթի բոլոր պահանջներն, ըստ էության խախտվեցին, եւ էլեկտրացանցերի սեփականատեր դարձավ օֆշորային ընկերություն:
2. Բաշխիչ ցանցերի սեփականատաիրոջ կողմից խախտվել են պայմանագրով նախատեսված բազմաթիվ կետեր, այդ թվում` ծավալուն ներդրումներով համակարգն արդիականացնելու եւ էլեկտրաէներգիայի կորուստները կրճատելու ուղղությամբ, որի համար հորդորում ենք ՀՀ կառավարությանը ձեռնարկել համարժեք քայլեր:
3. Բնակչությունը չպետք է վճարի էլեկտրաէներգիայի մատակարարման ոլորտում տեղ գտած ապօրինությունների, շորթումների եւ չհիմնավորված ծախսերով պայմանավորված ուռճացված սակագինը:
4. Անհրաժեշտ է մանրակրկիտ հաշվետվություն պահանջել բաշխիչ էլեկտրացանցերի սեփականատիրոջից եւ պատասխանատվության ենթարկել վերջինիս` բոլոր հանցավոր գործողությունների համար:
5. Իրականում կան հնարավորություններ` ոչ միայն չթանկացնելու էլեկտրաէներգիայի սակագինը, այլեւ իջեցնելու այն. բազմաթիվ կայանների արտադրած էլեկտրաէներգիայի ինքնարժեքը վաճառվող գնի կեսն էլ չի կազմում, ինչը վկայում է գերշահույթների առկայության մասին: Միայն Տաթեւ ՀԷԿ-ի արտադրած էլեկտրաէներգիայի ինքնարժեքը տատանվում է մեկ-երկու դրամի սահմաններում, իսկ Վրաստան եւ Իրան արտահանվող էլեկտրաէներգիայի սակագինը զիջում է ՀՀ-ում սահմանվող սակագնին:
6. Պետք է կյանքի կոչել ակադեմիկոս Պարիս Հերունու եւ պրոֆ. Վահան Համազասպյանի կողմից հեղինակած «Հայաստանի հելիոֆիկացիայի ծրագիրը», որը հնարավորություն է ստեղծում էլեկտրաէներգիայի հանդեպ պահանջարկը գյուղական բնակավայրերում կրճատել կիսով չափ, ինչը նույնպես կթեթեւացնի բնակիչների կենցաղային ծախսերը:
Հաշվի առնելով հասարակության մեծ մասի ցածր գնողունակությունը եւ աղքատության բարձր մակարդակը, ինչպես նաեւ էլեկտրաէներգիայի սակագնով պայմանավորված` մյուս ապրանքների եւ ծառայությունների թանկացման անխուսափելիությունը, Սոցիալ Դեմոկրատ Հնչակյան կուսակցությունը գտնում է ՀՀ Կառավարությունը ոչ միայն չպետք է թույլ տա էլեկտրաէներգիայի հետագա թանկացումը, այլ նաեւ կտրուկ գործողություններ կիրառի՝ այն էժանացնելու համար»: