Երեւանի Արշակունյաց պողոտայի թիվ 30 շենքի մոտակա վերգետնյա անցումի վրա գտնվող գովազդային վահանակի վրա այսօր՝ մայիսի 30-ին, նստած 51-ամյա քաղաքացուն խուլուհամր տղամարդն է համոզել ինքնասպանություն չգործել: Այս մասին NEWS.am-ին պատմեցին ականատեսները:

Նրանց խոսքով՝ ինքնասպանության փորձ կատարած տղամարդը ոստիկաններից 30 հազար դրամ է պահանջել:

«Ոստիկաններն էլ 40 հազար տվեցին, բայց ոչ մի կերպ չէր համաձայնվում իջնել գովազդային վահանակից: Մոտակայքում մի խուլուհամր տղամարդ կար, որը սկսեց նրա հետ խոսել ժեստերով, իրար հասկանում էին, հետո էլ մի կերպ համոզեց ու գրկած իջեցրեց վահանակի վրայից»,- պատմեցին ականատեսները:

Ավելի վաղ ՏԿԱԻՆ մամուլի ծառայությունը հայտնել էր, որ 51-ամյա տղամարդը մայիսի 30-ին ժամը 17.38-ին ահազանգ է ստացվել, որ Երեւանի Արշակունյաց պողոտայի թիվ 30 շենքի մոտակա վերգետնյա անցումի մոտ քաղաքացին նստել է գովազդային վահանակի վրա եւ փորձում է վնասել իրեն` կտրելով երակները. անհրաժեշտ փրկարարների օգնությունը: Փրկարարները եւ հրշեջ-փրկարարները վերգետնյա անցումի գովազդային վահանակի (մոնիտոր) վրայից իջեցրել են 51-ամյա Կ. Մ.-ին, ով վնասել էր երակները, ցուցաբերել համապատասխան օգնություն: Վերջինս տեղափոխվել է ոստիկանության Շենգավիթի բաժին: