Նոր միջուկային էներգաբլոկի նախագծումն ու նրա շինարարությունը կսկսվի, երբ պատվիրատուի պահանջով կորոշվեն օգտագործվող տեխնիկական միջոցները եւ այլ նախագծային բնութագրիչներ, ինչպես նաեւ կլուծվի ֆինանսավորման հարցը: Այս մասին NEWS.am-ի թղթակից հետ զրույցում նշել է «Ատոմստրոյէքսպորտ» ընկերության աղբյուրը: ներկայումս, նախագծի կոնկրետ արժեքը դեռ որոշված չէ:
«Նոր էներգաբլոկի արժեքը պետք է համաձայնեցվի այդ նախագծի իրականացման ֆինանսավորման կառուցվածքը հստակեցնելու արդյունքում: Նրա արժեքը որոշվելու է օգտագործվելիք տեխնիկական պայմաններով, որոնք կարտացոլվեն պայմանագրում»,- ասել է աղբյուրը:
Հարցին, թե արդյո՞ք Ռուսաստանը կմասնակցի գործող էներգաբլոկի վերացման գործին, աղբյուրը պատասխանել է, որ հայկական կողմից համապատասխան դիմում ստանալու դեպքում «Ատոմստրոյէքսպորտը» պատրաստ է մասնակցել գործող էներգաբլոկը շահագործումից հանելու աշխատանքներին:
«Դրա համար մեր ընկերությունն ունի բոլոր անհրաժեշտ միջոցները: Մեզ է պատկանում NUKEM Technologies GmbH ընկերության 100 տոկոսը, որն ունի բոլոր հմտությունները` էներգաբլոկը շահագործումից հանելու, կամ ռադիոակտիվ թափոնների հետ համապատասխան ձեւով վարվելու հարցում: NUKEM Technologies GmbH ընկերության ձեռքբերումը հնարավորություն է տվել մեզ հաջողությամբ ներգրավվել ինչպես հին ատոմակայանները շահագործումից հանելու, այնպես էլ ռուսական ու եվրոպական ամենաառաջավոր տեխնոլոգիաներով նոր ատոմակայաններ կառուցելու գործում»,- ասել է նա:
Աղբյուրի հավաստմամբ, նոր միջուկային էներգաբլոկը բարձր արդյունավետություն ունեցող եւ էկոլոգիապես անվտանգ նախագիծ է, որը երկար ժամանակ կծառայի: «Նախագծում օգտագործվում է 4 ուղի ունեցող անվտանգության համակարգ, գործում են պաշտպանության ակտիվ եւ պասիվ սարքեր, վերահսկման եւ կառավարման թվային համակարգ: Դրանք կանխարգելում են ցանկացած վթարային իրավիճակի անցանկալի զարգացում»,- ասել է նա:
Նշենք, որ օրերս ՀՀ կառավարությունը հաստատել է «Հայաստանի տարածքում նոր միջուկային էներգաբլոկներ կառուցելու համար համագործակցության մասին» Ռուսաստանի կառավարության հետ կնքվելիք համաձայնագրի նախագիծը։ Այդ համաձայնագրի 1-ին հոդվածով նախատեսվում է Հայաստանի տարածքում, ԱԷԿ-92 նախագծի համաձայն, 1060 ՄՎտ հզորությամբ ջրային էներգետիկ ռեակտորով, 60 տարվա շահագործման ժամկետով, Եվրոպական շահագործող կազմակերպությունների ակումբի (EUR) չափանիշների համապատասխան սերտիֆիկացված նոր միջուկային էներգաբլոկների կառուցում: