Հայաստանի փրկարարները մեկնում են Ռուսաստան` հրդեհների մարմանը մասնակցելու նպատակով:
Ինչպես NEWS.am-ը տեղեկանում է Արտակարգ իրավիճակների նախարարության մամուլի ծառայությունից, նախարարության 28 հրշեջներ 10 տոննանոց 4 հրշեջ ավտոմեքենաներով օգոստոսի 5-ից 10 օրով մեկնում են Ռուսաստան՝ հրդեհաշիջման աշխատանքներին մասնակցելու:
Հայկական Իլ-76 2 ռազմատրանսպորտային ինքնաթիռները վայրէջք կկատարեն Նիժնի Նովգորոդում, որտեղից հայ հրշեջները ռուս գործընկերների տեղաբաշխմամբ կանցնեն ծառայության:
Հայկական խմբի ղեկավարն է հրդեհաշիջման գործում մեծ փորձառություն ունեցող, Փրկարար ուժերի վարչության պետի տեղակալ, գնդապետ Պավել Գյոզալյանը:
Ռուսաստանում շարունակվում են անտառային հրդեհները, գրանցվել են հրդեհների շուրջ 600 օջախներ։ Ռուսաստանի 7 շրջաններում արտակարգ իրավիճակ է հայտարարվել։ Բնական աղետից մինչ օրս զոհվել է չորս տասնյակից ավելի մարդ:
Հիշեցնենք, որ ԱԻՆ փրկարար ծառայության լրատվական բաժնի ղեկավար Նիկոլայ Գրիգորյանը երեկ NEWS.am-ին հաղորդել էր, որ Ռուսաստան կուղարկվի միայն հրշեջ տեխնիկա, իսկ արդեն այսօր մեր հարցին, թե ինչո՞ւ են փոխել այդ որոշումն ասաց. «Դե հո միայն տեխնիկա չէինք ուղարկի»:
