Ինֆորմացիոն տեխնոլոգիաների ձեռնարկությունների միության (ԻՏՁՄ) կողմից կազմակերպվող եւ ՀՀ Վարչապետի աջակցությամբ իրականացվող ամենամյա ԴիջիԹեք բիզնես ֆորումն այս տարի կանցկացվի հունիսի 19-ին եւ 20-ին «Արմենիա Մարիոթ» հյուրանոցային համալիրում: Ֆորումը տեխնոլոգիական բիզնեսի եւ տնտեսության այլ բնագավառների միջեւ երկխոսության միակ հայաստանյան հարթակն է:
ԴիջիԹեք բիզնես ֆորումին կմասնակցեն հայաստանյան ՏՏ ոլորտի եւ բիզնեսի այլ բնագավառները ներկայացնող ընկերությունները, ինչպես նաեւ պետական կառավարման ոլորտի կազմակերպությունները: Երկօրյա տեխնոլոգիական ֆորումի ընթացքում տեղի կունենան տեղական եւ միջազգային փորձի ներկայացումներ, պլենար նիստեր, սեմինարներ եւ այլ քննարկումներ:
Բիզնես ֆորումում իրենց մասնակցությունն են ունենալու ֆորումի գործընկեր «Ֆորում Բիզնես Կենտոն»-ը, ինչպես նաեւ «Ամերիա Բանկ», «Արփիար», «Բիզնեսի աջակցման կենտրոն», «Բեւեռ կոմպյուտեր», «Երեւակ», «ԷԿԵՆԳ», «Էներջայզ Գլոբալ Սերվիսիզ», «Թել-Սելլ», «Ինստիգեյթ», «Ինստիգեյթ Խորհրդատվություն», «Ինստիգեյթ Մոբայլ», «Ինստիգեյթ Ռոբոտիքս», «Ինստիգեյթ ուսումնական կենտրոն», «Լայմ Տեխ», «Լեվիաթան», «Հիբրիդ սոլյուշնս», «Մասիս Տեք», «Մայ քարդ», «Մոնիտիս», «Նայիրի համընկերություն», «Նիկիտա մոբայլ», «ՍՕՍ սիսթեմս», «Սի-Քյու-Ջի», «ՎՕԼՕ», «Օրակլ Արմենիա» եւ այլ հեղինակավոր ընկերություններ:
ԻՏՁՄ գործադիր տնօրեն Կարեն Վարդանյանը նշում է. «Տարիներ շարունակ Հայաստանում ՏՏ ոլորտը տարեկան կայուն եւ տեսանելի աճ է արձանագրում, սակայն որքան էլ ՏՏ ոլորտն առանձին վերցրած աճ ունենա, միեւնույն է իրական արդյունքի կհասնի այն դեպքում, երբ հայկական բիզնեսի այլ ճյուղերը եւ պետական կառավարման համակարգը զգալի չափով սկսեն կիրառել տեխնոլոգիական լուծումներ իրենց գործունեության մեջ»:
Նշենք նաեւ, որ այս տարվա բիզնես ֆորումի օրակարգում կլինի նորույթ. առաջին անգամ ֆորումի շրջանակներում կանցկացվի տեխնոլոգիական լուծումներ կիրառող ոչ ՏՏ ոլորտի ընկերությունների մրցանակաբաշխություն: «Դիջիբիզնես» անունը կրող մրցանակը տարբեր անվանակարգերով կշնորհվի այն ընկերություններին, որոնք իրենց գործունեության մեջ հաջողությամբ կիրառում են առաջատար տեխնոլոգիական լուծումներ: