Հայաստանի ու Ադրբեջանի նախագահների հանդիպման հստակ ամսաթիվը դեռ անհայտ է, բայց մենք կայցելենք երկու մայրաքաղաքներ, եւ դա հարցերից մեկն է, որ կքննարկենք: Այս մասին NEWS.am-ի թղթակցի հետ զրույցում նշել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը:
Հարցին՝ առաջընթաց կա՞ ԼՂ հակամարտության կարգավորման բանակցային գործընթացում, Ուորլիքը պատասխանել է, որ հանդիպում կունենա Հայաստանի ԱԳ նախարար Էդվարդ Նալբանդյանի, իսկ ավելի ուշ՝ ՀՀ նախագահ Սերժ Սարգսյանի հետ: «Մենք կխոսենք բանակցային գործընթացում հետագա քայլերի մասին»,-ասել է ամերիկացի համանախագահը:
«Երկու նախագահներն էլ հայտարարել են երկխոսությունն ինտենսիվացնելու մտադրության մասին, եւ համանախագահները կօգնեն նրանց հեշտացնել այդ քննարկումները»,-ընդգծել է Ուորլիքը:
Նշենք, որ ԵԱՀԿ Մինսկի խմբի ամերիկացի համանախագահ Ջեյմս Ուորլիքը Երեւան է ժամանել հունիսի 9-ի երեկոյան: «Անհամբերությամբ սպասում եմ այսօրվա ու վաղվա հանդիպումներին՝ քննարկելու Ղարաբաղում խաղաղության հարցը»,-գրել է նա Twitter-ի իր միկրոբլոգում:
Հիշեցնենք, որ միջազգային միջնորդներից վերջին այցը տարածաշրջան տեղի է ունեցել այս տարվա փետրվարին: