«Վրաստանին վերջին շրջանում անհանգստացնում են Ադրբեջանի հետ ունեցած խնդիրները, որը կարող է հակամարտության լուրջ խնդիր հանդիսանալ Վրաստանի եւ Ադրբեջանի միջեւ»,- այս մասին օգոստոսի 18-ին «Ուրբաթ» ակումբում հայ-վրացական թեմայով մամլո ասուլիսի ժամանակ հայտարարել է վրացագետ Հայկազուն Ալվրցյանը։
Ըստ նրա, Վրաստանի Քվեմո Քարթլի կոչվող տարածքը, որն ըստ էության Հյուսիսային Լոռին է, այսօր գրեթե ամբողջությամբ ադրբեջանաբնակ է։ «Այնտեղ եկած Բորչալույի թուրքերն այնքան են աճել, շատացել, որ հասել են Թբիլիսի, Ծալկա, Ջավախք, շուտով կհասնեն նաեւ Արդահան։ Թուրքական կողմը գնալով խեղդում է Վրաստանին, ինչը վտանգ է ներկայացնում նաեւ Ջավախքի համար»,- հայտարարել է վրացագետը։ Հայկազուն Ալվրցյանի կարծիքով, Վրաստանը երկար տասնամյակներ շարունակ հայաթափելով այդ շրջանները, նոր դուռ բացեց թուրքերի համար։ «Ադրբեջանցիներն այսօր ոչ միայն հավակնում են այդ ողջ տարածքին, այլեւ բարձրաձայն հայտարարում են այդ մասին։ Վրացիները չեն կարողանա թուրքերի դեմն առնել»,- նշել է նա։
Վրացագետի խորին համոզմամբ, Վրաստանին սպառնում է հերթական մասնատումը, եւ որպես պետություն՝ քաղաքական քարտեզից ջնջվելու վտանգը։ «Եթե Վրաստանը կորցնի Քվեմո Քարթլիի եւ Ջավախքի տարածքները, որով Ադրբեջանը ու Թուրքիան կմիանան իրար, Հայաստանը կհայտնվի հարյուր տոկոսանոց շրջափակման մեջ։ Վրաստանը կկորցնի շատ կարեւոր ռազմական, տնտեսական նշանակություն ունեցող երկու հսկայական մարզեր՝ դառնալով երկրորդական երկիր, եւ որպես տարածաշրջանում գերակա պետություն իր ուժերը վերականգնելու հնարավորություն այլևս չի ունենա»,- հավաստիացրել է փորձագետը։