Թերթը զրուցել է ԲՀԿ խմբակցության պատգամավոր Վահե Էնֆիաջյանի հետ: Ներկայացնում ենք հարցազրույցից մի հատված:
Երբ Քոչարյանը ակտիվ քաղաքականությունից հեռացել է, սա ԲՀԿ-ին կօգնի՞, թե՞ կխանգարի: Նախկինում ասում էին, թե Քոչարյանն է ԲՀԿ թիկունքում, ԲՀԿ-ն Քոչարյանի պրոյեկտն է:
Քոչարյանի անձը հեռացել է քաղաքական դաշտից, թե չի հեռացել՝ մեզ հետ ինչ կապ ունի: Ես նորից եմ ասում՝ մենք ձեւաչափ ունենք՝ մեր կուսակցությունն ու կուսակցության նախագահը միշտ էլ հարգանքով են վերաբերվել այլ կուսակցություններին ու գործիչներին: Մենք մեր քաղաքական ծրագիրն ունենք, մենք մեր ծրագրով ենք առաջնորդվում: Եթե ինչ-որ մարդիկ ինչ-որ բան շահարկում են, դա չի նշանակում, որ այդ ամենն իրականություն է, իրականության հետ կապ ունի: Շատ բան կարող են ասել, խոսել, դա իրականության հետ կապ չունի: Եթե Քոչարյանը որոշի անդամակցել որեւէ կուսակցության, ապա ինքն այդ մասին կհայտարարի: Ինչի մասին է խոսքը:
Տեսակետ կա, որ ԲՀԿ-ն փորձելու է Քոչարյանին կրկին քաղաքականություն վերադարձնել:
Դրանք վերացական տեսակետներ ու պնդումներ են: Եթե նման բան լինի, մենք հայտարարությամբ հանդես կգանք:
Նման տեսակետի համար հիմք է հանդիսացել այն փաստը, որ կոալիցիոն կուսակցություններից միայն ԲՀԿ-ն է, որ չի հայտարարել Սերժ Սարգսյանին հաջորդ նախագահական ընտրություններում սատարելու մասին, իսկ ՀՀԿ-ն ու ՕԵԿ-ը հայտարարել են:
Դա իրենց քաղաքական համոզմունքն է, եթե կարծում են՝ ինչ-որ բան պիտի հայտարարեն, անկախ նրանից, ինչ հարցի է վերաբերվում, անում են: Դա նրանց ցանկություններն ու համոզմունքներն են:
Իսկ ԲՀԿ-ն ի՞նչ համոզմունքով չի հայտարարում Սերժ Սարգսյանին սատարելու մասին:
Եթե մենք մեր թեկնածուն ունենանք կամ որեւէ մեկին սատարենք, այդ մասին կհայտարարենք: Հանրությանը կտեղեկացնենք մեր որոշման մասին:
Այսինքն՝ հնարավոր է, որ Ձեր թեկնածուն ունենաք, այսինքն՝ այլ թեկնածու ունենաք ու Սերժ Սարգսյանին չսատարեք:
Պրովոկացիոն հարցեր եք տալիս: Ում որ որոշենք պաշտպանել, մենք նախապես կհայտարարենք, հասարակությունը ժամանակին կտեղեկանա մեր որոշման մասին:
2010 թվականի ամռանը խոսել 2013 թվականի ընտրություններին ԲՀԿ-ն իր թեկնածուն կունենա, թե կսատարի որեւէ մեկին, կարծում եմ՝ շատ վաղ է:
