Հոսանքի թանկացման դեմ բողոքի հանրահավաքի եւ երթի ժամանակ ՀՀ ոստիկանությունն իրեն նորմալ է պահել: Այս մասին, այսօր՝ հունիսի 23-ին, լրագրողների հետ զրույցում նշել է ԱԺ պետաիրավական հարցերի հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը:
Նրա խոսքով, ոստիկանությունը հունիսի 23-ի գիշերը ստիպված է եղել ազատել Բաղրամյան պողոտան՝ Երեւանի կարեւորագույն տրանսպորտային երակներից մեկը: «Հենց այդ պատճառով ոստիկանությունը բազմիցս զգուշացրել է ցուցարարներին, որ պետք է վերադառնալ Ազատության հրապարակ եւ չխանգարել տրանսպորտի աշխատանքին: Ոստիկանությունը հետեւում է ոչ միայն նրան, թե արդյոք հավաքվածների մեջ սադրիչներ կան, թե ոչ, որոնք կարող են վնաս հասցնել մյուսներին: Այստեղ ոստիկանությունը լիազորված է դիմել օրենքով թույլատրված գործողությունների»,-հավելել է պատգամավորը:
Դիտարկմանը, որ տեսախցիկները ֆիքսել են բռնություններ ոստիկանների կողմից, Սահակյանն առարկել է. «Հակաիրավական գործողություններ են եղել նաեւ ցուցարարների կողմից: Ընդհանուր առմամբ, ոստիկանության վարքը արդարացված է եղել, իսկ մասնավոր դեպքերը համարժեք ձեւով կքննարկվեն»:
Նշենք, որ չորս օր տեւած նստացույցից հետո հունիսի 22-ին ավարտվել էր «Ոչ թալանին» նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկաննեը փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել են ցույցը, ապա բերման ենթարկել ակտիվիստների եւ լրագրողների:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
Նշենք, որ ոստիկանության բաժիններ են տարվել «Հետքի», «Գալա» հեռուստաընկերության, «Հայկական Ժամանակ» օրաթերթի, news.am-ի եւ panarmenian.net-ի լրագրողները: Բախումների հետեւանքով հիվանդանոց բուժօգնության է դիմել 18 հոգի, 237 քաղաքացի բերման է ենթարկվել: Հարուցվել է քրեական գործ ՔՕ-ի 258-րդ հոդվածի 1-ին մասի հատկանիշներով՝ խուլիգանություն: