ՌԴ Դաշնության խորհրդի նախագահ Վալենտինա Մատվիենկոն հույս ունի, որ Հայաստանում իրավիճակը խաղաղ ճանապարհով կկարգավորվի։
«Մենք ուշադիր հետեւում ենք իրադարձություններին եւ հույս ունենք, որ հարցը կլուծվի խաղաղ ճանապարհով՝ իշխանությունների եւ ցուցարարների միջեւ բանակցությունների միջոցով»,- ընդգծել է Դաշնության խորհրդի խոսնակը։
Մատվիենկոն նաեւ հույս է հայտնել, որ Հայաստանի իշխանությունները կկարգավորեն իրավիճակը, որը Հայաստանի ներքին գործն է։ Խոսնակը ընդգծել է, որ Հայաստանը Ռուսաստանի բարեկամ երկիրն է, ԵՏՄ անդամ, եւ բնականաբար ՌԴ-ն անտարբեր չէ, թե ինչ է կատարվում Հայաստանում,- փոխանցում է ՏԱՍՍ-ը Մատվիենկոյի խոսքը։
Նշենք, որ չորս օր տեւած նստացույցից հետո հունիսի 22-ին ավարտվել էր «Ոչ թալանին» նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկաննեը փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել են ցույցը, ապա բերման ենթարկել ակտիվիստների եւ լրագրողների: Նշենք, որ այս պահին նստացույցը շարունակվում է, Բաղրամյան պողոտան փակ է, երթեւեկությունը կասեցված է: