ԱՄՆ Բոսթոն քաղաքում պաշտոնապես հրապարակվել է ահաբեկիչ Ջոհար Ցարնաեւի մահապատժի դատավճիռը։ Դատարանում վճիռը կարդացել է դաշնային դատավոր Ջորջ Օ՛Թուլը։
«Ամեն անգամ, երբ մարդիկ հիշատակեն ձեր անունը, նրանք հիշելու են այն չարությունը, որ դուք արել եք։ Նրանք հիշելու են, որ դուք կանխամտածված սպանել եւ խեղանդամել եք անմեղ մարդկանց։ Ես ձեզ դատապարտում եմ մահվան»,- ասել է դատավորը, հաղորդում է ՏԱՍՍ-ը։
Ավելի վաղ լսումներին ելույթ էին ունեցել 30 տուժածներ, որոնք պատմել են, թե ինչպես է դեպի վատը փոխվել իրենց կյանքը երկու տարի առաջ տեղի ունեցած ողբերգությունից հետո։ Տուժածների մեծ մասը ասել է, թե Ցարնաեւը արժանի է ամենադաժան պատժի։
Ցարնաեւն ինքն էլ ներողություն է խնդրել տուժածներից, զոհերի հարազատներից։ Նախկինում Ցարնաեւը երբեւէ դատարանում չի խոսել։
Նշենք, որ լսումների ժամանակ ոստիկանները դատարանի մոտ անհայտ անձի են բռնել, որը կասկածելի է թվացել։ Նրա մեքենայում կտրող գործիք են գտել, այլ մանրամասներ հայտնի չեն։
Բոսթոնի ահաբեկչությունը տեղի է ունեցել 2013թ. ապրիլի 15-ին։ Երեք մարդ զոհվել էր մարաթոնի ժամանակ, 260-ը վիրավորվել էին․ Ահաբեկչության հեղինակներից մեկը՝ Թամերլան Ցարնաեւը սպանվել էր, իսկ Ջոհար Ցարնաեւին բռնել էին։