Հայաստանի Ոստիկանությունը ուժ է կիրառել հունիսի 23-ի մեծ մասամբ խաղաղ ցույցը ցրելու համար, ինչը մտահոգություն է առաջ բերում մարդու իրավունքների հնարավոր ոտնահարումների կապակցությամբ։
Այս մասին ասված է Human Rights Watch իրավապաշտպան կազմակերպության հայտարարության մեջ։
Կազմակերպությունը կոչ է անում իշխանություններին անհապաղ հետաքննություն սկսել պարզելու համար, թե օրինական է եղել արդյոք ուժի կիրառումը, եւ պատասխանատվության կոչել նրանց, ովքեր չափից դուրս մեծ ուժ են կիրառել։ Իշխանությունները նաեւ պետք է հետաքննեն լրագրողների դեմ բռնության դեպքերն ու նրանց սարքավորումները կոտրելու հանգամանքը, ինչպես նաեւ ցույցը լուսաբանող լրագրողներին բերման ենթարկելը։
«Անգամ եթե բողոքի ակցիան արտոնված չէր, ոչինչ չի արդարացնում մեծ մասամբ խաղաղ ցուցարարների եւ լրագրողների վրա կատարած հարձակումները»,- հայտարարել է Հարավային Կովկասի հարցերով կազմակերպության փորձագետ Գեորգի Գոգիան։
Նրա խոսքով՝ բողոքի ցույցի վերսկսվելը ՀՀ իշխանություններին շանս է տալիս հարգանք ցուցաբերել խաղաղ հավաքների նկատմամբ եւ զերծ մնալ ցուցարարների դեմ բռնություն կիրառելուց։