Համաշխարհային բանկը Հայաստանին կօգնի կոմունալ ծառայությունների սակագների փոփոխության հետեւանքով աղքատության մակարդակի կանխատեսման մոդել ստեղծել: Այս մասին հունիսի 25-ին կառավարությունում կայացած ճեպազրույցում լրագրողներին ասաց Հայաստանի Աշխատանքի եւ սոցիալական հարցերի նախարար Արտեմ Ասատրյանը՝ պատասխանելով առաջին անհրաժեշտության ապրանքների գների հնարավոր շղթայական բարձրացման մասին NEWS.am-ի թղթակցի հարցին:
«Խնդիր ենք դրել այնպիսի մեթոդ մշակել, որպեսզի մեկուկես տարի չսպասենք տնային տնտեսությունների հետազոտությունների արդյունքներին, այլ նախապես գնահատենք»,- պարզաբանեց նախարարը:
Նրա խոսքով, սակայն, եթե խոսենք էլեկտրաէներգիայի թանկացման մասին, ապա Կառավարության արձագանքը կարելի է ժամանակային եւ սոցիալական ուղղվածության կոչել: Ասատրյանը հիշեցրեց, որ անապահով ընտանիքների բյուջեի վրա էլեկտրաէներգիայի թանկացման ազդեցությունը գնահատվում է 1.400 դրամ, իսկ նպաստները կբարձրանան 2.000 դրամով:
Նշենք, որ չնայած բազմաթիվ բողոքներին՝ Հայաստանի Հանրային ծառայությունները կարգավորող հանձնաժողովը հունիսի 17-ին հաստատեց էլեկտրաէներգիայի սակագինը 6.93 դրամով բարձրացնելու որոշումը՝ այն հասցնելով 48.78 դրամի: