Հայաստանի երկրորդ նախագահ Ռոբերտ Քոչարյանը ուշադրությամբ հետեւում է իրադարձությունների զարգացմանը: Այս մասին NEWS.am-ի թղթակցի հետ զրույցում ասաց նրա գրասենյակի ղեկավար Վիկտոր Սողոմոնյանը: Նա նշեց, որ նախագահ Քոչարյանը առայժմ չի ուզում հրապարակայնորեն արտահայտվել էլեկտրաէներգիայի սակագնի թանկացման թեմայով, քանի որ չի ցանկանում թեժացնել առանց այդ էլ լարված իրավիճակը: «Սակայն առաջիկայում նա անպայման կներկայացնի իր տեսակետը ինչպես այս, այնպես էլ կուտակված այլ խնդիրների վերաբերյալ»,-ասաց Վիկտոր Սողոմոնյանը:

Նա նշեց նաեւ, որ Ռոբերտ Քոչարյանը Մոսկվայում պետք է մասնակցի «Սիստեմա» ընկերության բաժնետերերի ժողովին, եւ արդեն կիրակի երեկոյան կլինի Հայաստանում:

Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ  կՎտ/ժ-ի դիմաց 41.85 դրամից դառնալով 48.78 դրամ։  «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայություննները կարգավորող հանձնաժողովի կայացրած որոշումը։