Օգոստոսի 10-ին ժամը 12-ին Մյասնիկյանի արձանի մոտից մեկնարկել է «Հայազն» երիտասարդների միաբանության կազմակերպած ակցիան` նվիրված Սեւրի պայմանագրի կնքման 90-ամյակին: Ակցիայի մասնակիցները, եռագույնի եւ Սեւրի պայմանագրով մեզ հասանելիք տարածքների քարտեզով դրոշը ձեռքներին, նամակներ են հանձնել ՀՀ-ում Իտալիայի, Ֆրանիսայի, ԱՄՆ-ի դեսպանատներին: Նամակները ուղղված են եղել նշված պետությունների դեսպաններին:
Լրագրողների հետ զրույցում, ակցիայի պատասխանատու, «Հայազն» երիտասարդների միաբանության կենտրոնական կոմիտեի անդամ Արմեն Մկրտչյանը ակցիայի մասին ասել է. «Այս ակցիան նվիրված է Սեւրի պայմանագրի կնքման 90-ամյակին: 90 տարի առաջ, հենց այս օրը, Թուրքիայի պատվիրակը ստորագրեց Սեւրի պայմանագրի տակ` ճանաչելով Հայաստանի տարածքային ամբողջականությունը մեր պատմական հայրենիքի մի մասի վրա: Հավատացած ենք, որ մեծ տերությունների արդարամտության շնորհիվ կնքված այս պայմանագիրը մոտ տարիներին կյանքի կկոչվի եւ թղթից կվերածվի գործի: Մենք մեր նամակներով, շնորհակալություն ենք հայտնում տվյալ պետություններին` իրենց ցուցաբերած աջակցության համար»: