Խաղաղ պայմաններում մահացած զինծառայող Արթուր Ղազարյանի մորը՝ Իրինա Ղազարյանին, ՀՀ պաշտպանության նախարար Սեյրան Օհանյանը բազմիցս ընդունել է, լսել եւ ամեն կերպ աջակցել իր իրավասության սահմաններում: Այս մասին այսօր՝ հունիսի 29-ին, NEWS.am-ի հետ զրույցում ասաց ՀՀ պաշտպանության նախարարի մամուլի խոսնակ Արծրուն Հովհաննիսյանը:
«Մենք տիկին Իրինային այս պահին միայն իրավաբանական աջակցություն կարող ենք ցուցաբերել, ինչից ինքը հրաժարվել է: Նոր ի հայտ եկած փաստական հանգամանքները տիկինը պետք է իրավապահ համակարգին ներկայացնի, ոչ թե պաշտպանության նախարարին»,-ասաց նա:
Ավելի վաղ NEWS.am-ի հետ զրույցում Իրինա Ղազարյանը հայտնել էր, որ Պաշտպանության նախարարության նամակների բաժնի աշխատակիցը իրեն փոխանցել էր, որ ՀՀ Պաշտպանության նախարար Սեյրան Օհանյանը ժամանակ չունի ընդունելու իրեն: Մահացած զինծառայողի մայրը պնդում է, որ ինքը նոր փաստական հանգամանքներ ունի որդու մահվան հետ կապված, որը ցանկանում է ներկայացնել պաշտպանության նախարարին:
Նշենք, որ Արթուր Ղազարյանը մահացել է 2010 դեկտեմբերի 17-ին Հադրութի զորամասերից մեկում: Ծնողները չեն ընդունում որդու մահվան պաշտոնական վարկածը, ըստ որի, նրա գլխում չարորակ ուռուցք է հայտնաբերվել: Ծնողները պնդում են, որ իրենց որդին սպանվել է զորամասում տեղի ունեցած միջադեպի պատճառով:
