Ադրբեջանը հանդես է գալիս Հայաստանի նկատմամբ անթաքույց ագրեսիայով, հետեւաբար, ուզում ենք, թե` ոչ, բայց Հայաստանը պետք է համապատասխան քայլեր ձեռնարկի, որպեսզի թույլ չտա տարածաշրջանում ուժերի հարաբերակցության այնպիսի խախտում, որ Ադրբեջանը խախտի խաղաղությունն ու պատերազմ սանձազերծի: NEWS.am-ի թղթակցի հետ զրույցում նման կարծիք է հայտնել «Ժառանգություն» ընդդիմադիր կուսակցության խորհրդարանական խմբակցության ղեկավար Ստեփան Սաֆարյանը՝ մեկնաբանելով Հայաստանի պաշտպանության նախարար Սեյրան Օհանյանի հայտարարությունը, թե Հայաստանը ռազմարդյունաբերական համալիրի զարգացման երկու ծրագիր է իրագործում, որոնք կավարտվեն մինչեւ 2015թ.:
«Այսպես, թե այնպես մենք պետք է մտածենք թե' հարձակման, թե' պաշտպանության մասին»,- ասել է Սաֆարյանը՝ հավելելով, որ եթե միջազգային հանրությունը չի դատապարտում եւ չի պատժում Ադրբեջանին իր ագրեսիայի համար, մենք ինքներս պետք է միջոցներ ձեռնարկենք ադրբեջանցիների մղումները հանդարտեցնելու համար: Նա լիովին իրատեսական համարեց նման ծրագրերի իրականացումը: «Հայաստանը ֆանտաստիկ պոտենցիալ ունի, հատկապես եթե դա վերաբերում է երիտասարդությանը: Պետք է միայն զարգացնել այն եւ ճիշտ հունի վրա դնել»,- նկատել է նա:
Ինչպես արդեն հայտնել է NEWS.am-ը, Հայաստանի պաշտպանական միջգերատեսչական հանձնաժողովի օգոստոսի 10-ին կայացած նիստում պաշտպանության նախարարը հայտնել է, որ այսօր ռազմարդյունաբերական համալիրի զարգացման 2 ծրագիր կա: Ըստ Օհանյանի՝ այժմ այդ ծրագրերը գտնվում են ֆինանսական արժեւորման փուլում: Հայաստանի գլխավոր շտաբը հստակեցնում է արդիականացման կամ ներկրման ենթակա ռազմական տեխնիկայի ցանկը:
