Արդեն 2-րդ տարին է, որ ահազանգում եմ այն մասին, որ Երեւանի ավագանու ՀՀԿ խմբակցության անդամ Գեւորգ Խաչատրյանը զավթել է Բաբաջանյան 18/3 հասցեում իրեն ամրագրված հողակտորին հարեւան, նույն մակերեսով հողակտորը: Այս մասին Երեւանի քաղաքապետ։ Տարոն Մարգարյանին ուղղվածիր նամակում գրել է Երեւանի ավագանու «Բարեւ Երեւան» խմբակցության ղեկավար Անահիտ Բախշյանը:
Նա մասնավորապես, նշել է.
«Այս մասին ինքներդ վկայեցիք Երեւանի ավագանու անցյալ տարվա նիստերից մեկի հարց ու պատասխանի ժամանակ: Ամեն երկուշաբթի գործակարգավարականի ժամանակ սպասում եմ, որ Հայկ Ասատրյանը հողազավթումների մեջ կնշի այս հասցեն, բայց այդպես էլ չի ասվում , որը վկայում է քաղաքին պատկանող հողերի մութ գործարքների մասին: Ով գիտե, թե նման քանի հողազավթում կա Երեւանում եւ դրանով որքան վնաս է պատճառվում Երեւանի բյուջեին:
Եթե իշխող հանրապետական կուսակցության Երեւանի ավագանու անդամը եւ քաղաքապետարանի համապատասխան մարմինների պաշտոնյաները Ձեր գիտությամբ նման անօրինական հողազավթում են թույլ տալիս եւ Դուք չեք բռնում նրանց ձեռքը, նշանակում է Դուք էլ եք հանցակից:
Այս մասին ես հերթական անգամ բարձրաձայնում եմ եւ պահանջում Ձեզանից պատժել Գեւորգ Խաչատրյանին, նախկին տեսքի բերել այդ զավթած հողը, բարեկարգել եւ վերադարձնել քաղաքին ու այն դնել օրինական աճուրդի»: