Երեւանի բնակիչ Վյաչեսլավ Լուկինին ՀՀ քրեական օրենսգրքի 34-329-րդ հոդվածի առաջին մասի հատկանիշներով մեղադրանք է առաջադրվել:
Դատական տեղեկատվական համակարգի փոխանցմամբ, ՀՀ քաղաքացի Վյաչեսլավ Գենադիի Լուկինը, նպատակադրվելով ապօրինի հատել ՀՀ պահպանող պետական սահմանը եւ մուտք գործել Թուրքիայի Հանրապետության տարածք, 2015 թվականի ապրիլի 6-ին Երեւան քաղաքից ավտոբուսով մեկնել է ՀՀ Արարատի մարզի Արտաշատ քաղաք, այնուհետեւ, ուղեւորվելով հայ-թուրքական պետական սահման, ժամը 21:40-ի սահմաններում, հաղթահարելով ՀՀ պահպանվող պետական սահմանի ինժեներատեխնիկական արգելանքները, փորձել է ապօրինի հատել ՀՀ պահպանող պետական սահմանը, սակայն հանցագործությունն ավարտին չի հասցրել իր կամքից անկախ հանգամանքներով, քանի որ հայտնաբերվել է սահմանապահ ծառայողների կողմից ՀՀ Արարատի մարզի, Շահումյան համայնքի վարչական տարածքում:
Մեղադրյալին սպառնում է նվազագույն աշխատավարձի հարյուրապատիկից երկուհարյուրապատիկի չափով տուգանք կամ առավելագույնը երեք տարի ժամկետով ազատազրկում:
Քրեական գործը քննվելու է Արարատի եւ Վայոց Ձորի մարզերի ընդհանուր իրավասության դատարանում: