Եվրամիությունը Հունաստանի կառավարությունից պահանջում է մեծացնել նավատերերից գանձվող հարկը եւ կրճատել հարկային արտոնությունները դեֆոլտի եւ եվրոգոտուց դուրս մնալու սպառնալիքի աճող վտանգի ֆոնին, հայտնում է Journal of Commerce-ը։

ԵՄ-ն, ԱՄՀ-ն եւ ԵԿԲ-ն Աթենքին կոչ են արել մեծացնել տոննաժի դիմաց նավերից գանձվող հարկը եւ աստիճանաբար նավերի սեփականատերերին զրկել հատուկ հարկային ռեժիմի արտոնություններից, փոխանցում է ՏԱՍՍ-ը։

Նշենք, որ հույն նավատերերը վերահսկում են համաշխարհային նավատորմի մոտ 1/5-ը եւ ԵՄ նավատորմի կեսից ավելին։ Նրանք Հունաստանի ամենահարուստ քաղաքացիներն են, որոնք համաձայնվել էին տոննաժի լրացուցիչ հարկ մուծել, որը կազմում է տարեկան 420 մլն եվրո, սակայն հարկային ռեժիմի վերանայման ցանկացած փորձ նրանց կարող է ստիպել անցնել Եվրոպայի եւ Ասիայի այլ հատվածների իրավասության տակ։