Հունաստանի իշխանությունները համաձայնվել են ընդունել միջազգային վարկատուների պայմանները, գրում է Financial Times-ը՝ վկայակոչելով Հունաստանի վարչապետ Ալեքսիս Ցիպրասի նամակը, որը նա ուղարկել է Եվրահանձնաժողովի, Արժույթի միջազգային հիմնադրամի եւ Եվրոպայի կենտրոնական բանկի ղեկավարներին։
Վարչապետը համաձայնվել է ընդունել վարկատուների պայմանները, որոնց մասին առաջարկն արվել էր անցյալ շաբաթ։ Նամակում վարչապետը խնդրում է երկարաձգել 29.1 մլրդ եվրո ֆինանսական օգնության ծրագրի ժամկետը եւ համաձայն է տնտեսական բարեփոխությունների բոլոր պայմաններին, այդ թվում՝ կոշտ տնտեսական քաղաքականությանը։
Միակ բացառությունը, որը պահանջում է Ցիպրասը, հունական կղզիներին 30 տոկոս հարկային արտոնություն տրամադրելն է։ Ցիպրասն իր նամակում այդ միջոցը ձեռնարկելու անհրաժեշտությունը բացատրել է անհրաժեշտ ապրանքների եւ ռեսուրսների մատակարարման բարդություններով, փոխանցում է Gazeta-ն։
Ցիպրասը նաեւ համաձայնվել է բարձրացնել թոշակային տարիքի շեմը մինչեւ 67 տարեկան, սակայն խնդրում է դա կիրառել ոչ թե միանգամից, այլ 2022թ. հոկտեմբերից։
Ավելի վաղ ԱՄՀ-ն հաստատել էր, որ Հունաստանը խնդրել է երկարաձգել վարկերի ժամկետը։