Ամուսնու կողմից ծանր հրազենային վնասվածք ստացած ծննդկանի վիճակը կայուն ծանր է, բայց առկա է դրական դինամիկա: Այս մասին NEWS.am-ի թղթակցի հետ զրույցում ասաց Երեւանի Պերինատոլոգիայի, մանկաբարձության եւ գինեկոլոգիայի կենտրոնի ղեկավար Ռազմիկ Աբրահամյանը:
Նա նշեց, որ նման պայմաններում վիճակի չվատանալը արդեն իսկ դրական է: Ռազմիկ Աբրահամյանի խոսքով՝ իրենք ամեն ինչ անում են, որպեսզի մայրը ու որդին շարունակեն ապրել, տարբեր մասնագետներ են հետազոտում նրանց: Երկուսն էլ առայժմ գտնվում են Վերակենդանացման բաժանմունքում: «Վիճակի վատացում չկա, դա արդեն իսկ լավ է, գիտակցություն ունի, հասկանում է, ցույց է տալիս, բայց արհեստական շնչառության տակ է, այս ընթացքում ինչքան արհեստական թթվածին տանք, այնքան լավ, ամեն ինչ անելու ենք, որ իրենք ապրեն»,-ասաց բժիշկը:
Ավելի վաղ NEWS.am-ը հայտնել էր, որ Երեւանի Պերինատոլոգիայի, մանկաբարձության եւ գինեկոլոգիայի կենտրոնում հունիսի 30-ին արտակարգ դեպք է գրանցվել: Ամուսինը եկել էր հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել:
Մեզ հաջողվեց պարզել, որ նրանք ապրում են Դավիթաշենում, կինը՝ 27-ամյա Միլենա Ա.-ն ծննդաբերել է 8 ամսականում: Ամուսինը՝ 33-ամյա Հայկ Վ.-ն գալով հիվանդանոց տեսել էր զոքանչին եւ հարազատներին այնտեղ, ապա նրանց ուղարկել էր բուլկի գնելու եւ կրակել կնոջ պարանոցին: Ամուսինը տեղում մահացել էր, կնոջը վիրահատել են, վիճակը ծայրահեղ ծանր է, լույս աշխարհ եկած բալիկը լավ է:
