ԱՄՆ Թեքսաս նահանգի ոստիկանները Փալեսթայն քաղաքում սպանել են գարեջրի գողության մեջ կասկածվող տղամարդուն, որը ձերբակալության պահին փորձել է գործի դնել օդամուղ ատրճանակը։
Միջադեպը տեղի է ունեցել մայիսի 31-ին, սակայն այս մասին հանրությանը հայտնի է դարձել միայն վերջերս՝ YouTube-ում ձերբակալությունը ներկայացնող տեսահոլովակի հայտնվելուց հետո։
Ոստիկանությունը հայտնում է, որ տղամարդուն կասկածում էին խանութից գարեջուր գողանալու մեջ։ Խանութի սեփականատերը ոստիկաններին պատմել է, որ ենթադրյալ գողը փախել էր հարեւանությամբ գտնվող սրճարանը։ Տեսահոլովակում երեւում է, թե ինչպես են նրան այնտեղից դուրս բերում ոստիկանները։ Տղամարդը դիմադրություն է ցույց տվել՝ ճանկելով օդամուղ ատրճանակը եւ փորձելով գործի դնել այն։ Դրանից հետո 2 ոստիկանները կրակ էին արձակել նրա վրա, գրում է BBC-ի Ռուսական ծառայությունը։
Ոստիկանները փորձել են նրան առաջին օգնություն ցուցաբերել, սակայն տղամարդը մահացել է։