Գորիսի «Սդղի գյոլի» ծեծկռտուքի գործով մեղադրյալ  Սյունիքի մարզպետ Սուրիկ Խաչատրյանի եղբայրը՝ Սեյրան Խաչատրյանը (առավել հայտնի է որպես Աղալար) հրաժարվել է ցուցմունքներ տալուց: Այս մասին NEWS.am-ի թղթակցի հետ զրույցում ասաց  նրա փաստաբանը՝ Արմեն Խաչատրյանը:

Նա նշեց, որ իր պաշտպանյալը հրաժարվել է ոչ միայն ցուցմունք տալուց, այլեւ մեղադրանքի վերաբերյալ դիրքորոշում հայտնելուց: Նախկինում եւս Սեյրան Խաչատարյանին կանչել են քննչական, սակայն փաստաբանը այդ ժամանակ չի մասնակցել եւ չգիտի՝ ցուցմունքներ տվել է, թե ոչ: Արմեն Խաչատարյանն ասաց, որ առայժմ որեւէ գործողություն չեն կատարելու, թող նախաքննական մարմինը քննություն կատարի, եթե հանգի վերջնական եզրակացության, այդ ժամանակ կորոշեն:

Ավելի վաղ հայտնել էինք, որ մայիսի 2-ին՝ ժամը 17-ի սահմաններում, «Սդղի գյոլ» կոչվող տարածքում առաջացած վիճաբանության ժամանակ ժամանակ մի խումբ անձինք ծեծել են Մուշեղ Զաքարյանին՝ պատճառելով մարմնական վնասվածքներ, որի ժամանակ Սեյրան Խաչատրյանը եւս  ձեռքերով եւ ոտքերով հարվածներ է հասցրել նրա մարմնի տարբեր մասերին։ Սեյրան Խաչատրյանին մեղադրանք է առաջադրվել ՀՀ քրեական օրենսգրքի 118-րդ հոդվածով եւ հարցաքննվել։ Նրա նկատմամբ որպես խափանման միջոց է ընտրվել ստորագրություն չհեռանալու մասին։ Եւս  4 անձ ներգրավվել է որպես մեղադրյալ, նրանցից 3-ին մեղադրանք է առաջադրվել ՀՀ քրեական օրենսգրքի 113-րդ հոդվածի  2-րդ մասի 3-րդ կետով, իսկ 4-րդի նկատմամբ նույն մեղադրանքով հայտարարվել է հետախուզում։

Հիշեցնենք, մայիսի 2-ին Գորիսում Սյունիքի մարզպետ Սուրիկ Խաչատրյանի որդու մասնակցությամբ տեղի ունեցած ծեծկռտուքի հետեւանքով միջին եւ ծանր մարմնական վնասվածքներ էին ստացել Զաքարյան եղբայրները․ կոտրել էին Մուշեղ Զաքաչյանի քիթը, իսկ նրա եղբայրը՝ Հարութ Զաքարյանը զրկվել էր մեկ աչքի տեսողությունից։

Այս պահին քրեական գործով մեղադրանք է առաջադրվել 4 անձանց՝ հիմնականում մարզպետի մերձավոր շրջապատից։ Նրանցից մեկը Սուրիկ Խաչատրյանի՝ հետախուզման մեջ գտնվող զարմիկն է, ով հանրությանը հայտնի է իր քրեական անցյալով:2004 թվականին Մայիս Խաչատրյանը դանակի 12 հարվածով սպանել էր 30-ամյա մի երիտասարդի, դատապարտվել 12 տարվա ազատազրկման, սակայն վաղաժամ ազատվել էր պատժից։