Եթե իրոք ՌԴ-ն Հայաստանի ռազմավարական դաշնակիցն է, ապա Հայաստանն էլ ՌԴ-ի ռազմավարական դաշնակիցն է, ուրեմն այդտեղ ոչ ոք ոչ մեկին լավություն չի անում: Այս մասին այսօր՝ հուլիսի 2-ին, ԱԺ-ում ՌԴ-ի կողմից Հայաստանին 200 մլն դոլարի ապրանքային վարկ տրամադրելու (պաշտպանական նպատակներով) մասին պայմանագրի քննարկման ժամանակ հայտարարել է ՀԱԿ խմբակցության պատգամավոր, նախկին վարչապետ Հրանտ Բագրատյանը:
«Ունեցեք արժանապատվություն, երբ շփվում եք ռուսական կառավարության ներկայացուցիչների հետ. մի կնքեք պայմանագրեր, որոնք թերի են, սխալ են, երբեմն նաեւ՝ անգրագետ: Այսօրվա ՀԷՑ-ի իրավիճակն ուղիղ հետեւանքն է 2013-ի դեկտեմբերի 2-ի պայմանագրի, որով ՀԷՑ-ը պարտավոր է ՋԷԿ-երից գնել էլեկտրաէներգիա 40 դրամով, այն դեպքում՝, երբ 3 դրամով էլէներգիա կա, բայց նա չի գնում»,-ասել է նա:
Բագրատյանն այս հարցում մեղադրանք է հնչեցրել ՀՀԿ-ականների հասցեին. «Դուք եք մեղավոր հանրապետականներ: Դեկտեմբերի 2-ից առաջ ձեզնից մեկն ասա՞ց ռուսական ղեկավարությանը՝ սա ի՞նչ է: Մենք ո՞նց հանրապետությունը զարգացնենք, որի ՀՆԱ-ի մեջ գազն ու էներգետիկան։ կազմում են 11 տոկոս: Սրան գումարվում է 9 տոկոս տրանսպորտային ծախս, ու արդյունքում մեր ապրանքները 20 տոկոսով անմրցունակ են: Դուք հանրապետությունը մտցրել եք անմրցունակ դաշտ:
Ռուսաստանից 200 մլն դոլարի վարկային այս պայմանագրում նշվում է, որ եթե Հայաստանը փողը չի տալիս, ՌԴ-ն դա դարձնում է համախմբված պարտք եւ համարում անմիջապես մարման ենթակա: Այսինք Ռուսաստանը հայտարարում է, որ Հայաստանը դեֆոլտ է: Ինչու է այսպիսի նախադասություն մտցվել:
Եթե Ռուսաստանը ռազմավարական գործընկեր է, սովորեք արժանապատիվ ձեւով նրա հետ շփվելու»,-ընդգծել է Բագրատյանը:
