«Արմենտել» ընկերությունը (Beeline ապրանքանիշ) եւ ՏՏ ընկերությունների միությունը հուլիսի 2-ին հայտարարել են DigiCamp 3-րդ ամենամյա ճամբարի մեկնարկի մասին, որը կկայանա հուլիսի 6-16-ը Դիլիջանում։ Դրան կմասնակցեն 14-22 տարեկան տասնյակ երիտասարդներ Հայաստանի տարբեր մարզերից։
DigiCamp-ի հիմնական նպատակը ՏՏ ոլորտում ներգրավված երիտասարդության միավորումն է, մոտիվացնող եւ ուսումնական միջավայրի ստեղծումը, որը նոր սերնդին կխթանի ստեղծել սեփական բիզնեսն ու բիզնես նախագծերը։
Համաձայն ՏՏ ընկերությունների միության փոխտնօրեն Հայկ Չոբանյանի՝ նման միջոցառումները նպատակ ունեն զարգացնել ՏՏ ոլորտի տեղական շուկան, ինչը իր հերթին կարագացնի այդ ոլորտի զարգացումն ընդհանրապես։ «Մենք մեծ ուշադրություն ենք դարձնում այն հանգամանքին, որ ճամբարին մասնակցեն ՀՀ բոլոր մարզերի երիտասարդները։ Դա մեզ թույլ կտա հայտնաբերել տաղանդներ անգամ ամենահեռավոր գյուղերում»,- հայտարարեց Չոբանյանը՝ նշելով, որ իրենք արդեն ստացել են 150 դիմում։
«50 գաղափարներից ճամբարի առաջին օրը կընտրեն 8-10-ը, որոնցից վերջում ընտրվելու է մեկը՝ լավագույնը։ Մենք 3 մրցանակ ունենք, եւ մեր նպատակն է ոչ թե պարզապես երեխաներին մրցանակներ հանձնել, այլ այնպես անել, որ մրցանակները նպաստեն իրենց իսկ կազմած բիզնես պլանի կայացման ու զարգացման գործին»,-ասաց նա։
