Գերմանիան պատրաստ է ստանձնել ԵԱՀԿ նախագահության պատասխանատվությունը սառը պատերազմի ավարտից հետո սկսված ամենածանր ճգնաժամի ֆոնին։ Այս մասին հայտարարել է Գերմանիայի արտգործնախարար Ֆրանկ Վալտեր Շթայնմայերը՝ ներկայացնելով 2016թ. Գերմանիայի նախագահության առաջնայնությունները։
«Երկխոսություն, վստահություն եւ անվտանգություն, սրանք են Գերմանիայի նախագահության գլխավոր առաջնայնությունները»,- հայտարարել է Շթայնմայերը։
Նրա խոսքով՝ հենց երկխոսությունն է կարեւոր ուկրաինական ճգնաժամի կարգավորման եւ ԵԱՀԿ տարածքում վստահություն կառուցելու համար, քանի որ վերջին 1.5 տարում եվրոպական անվտանգության հարցում վստահությունն անհետացել է։
Իր ելույթում նա ընդգծել է ԵԱՀԿ դերի կարեւորությունը՝ որպես հակամարտությունների լուծման եւ կանխման գործիք, ինչպես նաեւ ուշադրություն է հատկացրել փոքրամասնությունների իրավունքների պաշտպանության հարցում մամուլի ազատության աջակցության վրա։
Արտգործնախարարը նաեւ ընդգծել է համագործակցության կարեւորությունն այնպիսի ոլորտներում, ինչպիսին սպառազինությունների վերահսկումն է։ «Եվրոպայում վստահության եւ համագործակցության ճանապարհին ավելի լավ է անել փոքր քայլել, քան առհասարակ ոչինչ չանել»,- նշել է նա։
