Ալգորիթմը, որը կառավարում է Facebook-ում ընկերների ակտիվությունը, այսինքն՝ որոշ գրառումներ միշտ ակտիվ են եւ աչքի առաջ, իսկ որոշներն առհասարակ չեն երեւում, շատ օգտատերերի համար անհասկանալի կմնա: Սակայն կա մի գործոն, որը բացատրում է, թե որ ժամին արված գրառումներն են հատկապես ակտիվ լինում ընկերների համար, գրում է The Washington Post-ը:
Klout կայքի հետազոտողները վերլուծել են Facebook-ում արված ավելի քան 25 մլն գրառում եւ դրանց 100 մլն արձագանք ու եկել այն եզրակացության, որ օրվա որոշակի ժամերի արված գրառումները ավելի ակտիվ քննարկման են արժանանում: Այսպես՝ ուշ առավոտյան եւ կեսօրից հետո առաջին 2 ժամվա ընթացքում կատարած գրառումները հատկապես երեւում են ձեր ընկերների ժապավենում: Ակտիվ են լինում նաեւ երեքշաբթի օրերին կատարված գրառումները, գրում է InoPressa.ru-ն:
Ֆեյսբուքյան ընկերները հատկապես ակտիվ են երեքշաբթի եւ չորեքշաբթի օրերին: Հինգշաբթի եւ ուրբաթ նրանց հետաքրքրությունը մարում է: Հանգստյան օրերին այն գրեթե անհետանում է, իսկ երկուշաբթի որպես կանոն մարդիկ հարմարվում են աշխատանքային առօրյային: Դրանով է պայմանավորված, որ հենց երեքշաբթի օրերին են նրանք որոշում աչքի անցկացնել իրենց Facebook-ը: